Жыл басынан бері көпбалалы отбасыларға 92,8 миллиард теңге жәрдемақы берілген

Биыл жыл басынан бері көпбалалы отбасыларға 92,8 миллиард теңге мемлекеттік жәрдемақы берілген. Орта есеппен еліміздегі 440,1 мың отбасы жәремақы алды, деп хабарлайды ҚазАқпарат Еңбек және халықты әлеуметтік қорғау министрлігінің баспасөз қызметіне сілтеме жасап. Баспасөз қызметінің мәліметтеріне қарағанда, 2021 жылғы сәуірде жәрдемақының бұл түрін 448,9 мың отбасы алған. Оларға беріген қаржы 23,6 миллиард теңге болды. Аталған мемлекеттік жәрдемақыға 4 және одан да көп бірге тұратын кәмелетке толмаған немесе 23 жасқа дейінгі күндізгі бөлімде оқитын студент балалары бар отбасылар табысына қарамастан үміткер бола алады. Жәрдемақы мөлшері бала санына байланысты сараланған: 4 балаға – 46 760 теңге, 5 балаға – 58 457 теңге, 6 балаға – 70 154 теңге, 7 балаға – 81 852 теңге, 8 балаға – 93 344 теңге, 9 балаға – 105 012 теңге, 10 балаға – 116 680 теңге, 11 балаға – 128 348 теңге, 12 балаға – 140 016 теңге, 13 балаға – 151 684 теңге, 14 балаға – 163 теңге 352 теңге, 15 балаға – 175 020 теңге, 16 балаға – 186 688 теңге. Еске сала кетейік, елімізде көпбалалы отбасыларға олардың кірістерін есепке алмай берілетін жаңа мемлекеттік жәрдемақы 2020 жылдың 1 қаңтарынан бастап атаулы әлеуметтік көмек көрсетудің жаңа тетіктерінде көзделген табысы аз және көпбалалы отбасыларды қолдаудың үш негізгі бағыты шеңберінде енгізілген болатын.

Серіктес жаңалықтары