Іздеуде жүрген Тараз әкімінің экс-орынбасары Грузияда ұсталды

Тараз қаласы әкімінің бұрынғы орынбасары Қайсар Сарытай Грузиядан ұсталды, деп жазды turkystan.kz. ҚР Сыбайлас жемқорлыққа қарсы іс-қимыл агенттігіне сілтеме жасап. Агенттіктің Жамбыл облысы бойынша аумақтық департаменті сыбайлас жемқорлық қылмыс жасады деген күдікпен Тараз қаласы әкімінің бұрынғы орынбасары Қайсар Сарытайды халықаралық іздестірумен айналысқан.

«Халықаралық ынтымақтастық аясында Грузияның құқық қорғау органдары сыбайлас жемқорлыққа қарсы қызметпен және ҚР ІІМ Интерполдың ҰОБ-мен бірлесіп Сарытайды Грузия аумағында ұстады, ол қамауға алынды. Қазіргі уақытта оны Қазақстанға экстрадициялау рәсімі жүзеге асырылуда», - делінген хабарламада.

Қайсар Сарытай мен мердігер компанияның басшысы «Smart-city: Ашық әкімдік» ақпараттық жүйесін сүйемелдеу және техникалық қолдау қызметіне бөлінген бюджет қаражатын жымқырды деген күдікке ілінген. Экс-шенеунікке ҚР Қылмыстық кодекстің 189-бабы, 4-бөлігі, 2-тармағы (аса ірі мөлшерде сеніп тапсырылған бөтен мүлікті иемдену немесе ысырап ету) және 362-бабы, 4-бөлігі, 3-тармағы (өзіне немесе басқа адамдарға немесе ұйымдарға пайда мен артықшылық алу не басқа адамдарға немесе ұйымдарға зиян келтіру мақсатында жасалған билікті немесе лауазымдық өкілеттіктерді асыра пайдалану) бойынша іс қозғалған. Қайсар Сарытай көп ұзамай Қазақстанға экстрадицияланады.

Серіктес жаңалықтары