50323
Германия Украинаға ауыр қару-жарақ жеткізетін болды
Германия Украинаға ауыр қару-жарақ жеткізетін болды
Бундестаг Украинаға ауыр қару-жарақ жеткізуге дауыс берді деп жазды turkystan.kz BILD басылымына сілтеме жасап. Парламент депутаттарының басым көпшілігі бірлескен депутаттық бастаманы қолдайтындықтарын білдірді.
28 сәуірде Бундестаг билеуші партиялар мен оппозициялық ХДО/ХСО блогы депутаттарының Украинаға ауыр қару-жарақ жеткізу жөніндегі бірлескен бастамасын басым дауыспен қолдады. 586 депутаттың дауысымен қабылданған қарарда Бундестаг Германия үкіметін Украинаға қажетті құрал-жабдықтарды жеткізуді жалғастыруға және мүмкіндігінше жеделдетуге, сонымен бірге бұл елге айналмалы жеткізілімдер аясында ауыр және күрделі қару-жарақ жүйелерін тасымалдауды кеңейтуге шақырды.
Сонымен бірге, құжатта бұл жабдықтарды Украинаға беру Германияның қорғаныс қабілетіне нұқсан келтірмеуі керектігі атап өтілген. 100 депутат бұл бастамаға қарсы дауыс берсе, 7-еуі қалыс қалды.
«Германия Бундестагы Ресейдің Украинаға қарсы аяусыз агрессивті соғысын қатаң түрде айыптайды. Ресей өз әрекетімен халықаралық және гуманитарлық құқық нормаларын өрескел бұзып, еуропалық әлемдік тәртіпті толығымен жоюға тырысуда», – делінген Бундестаг қабылдаған құжатта.Айта кету керек, дауыс беру алдында ХДО фракциясының жетекшісі Фридрих Мерц Германия канцлері Олаф Шольцты бірнеше апта бойы Украинаға қару-жарақ жеткізуден тартынғанын және жалтарғанын бетіне басып, айыптады. «Жасылдар» өкілдері Украинаның «өзін-өзі қорғауға шексіз құқығы бар», ал Германия қақтығысқа қатысқысы келмейтін Украинаны Ресей агрессиясынан қорғансыз қалдыра алмайтынын атап өтті. Еркін демократтар да Украинаға тікелей және жанама түрде қару-жарақ жеткізуді қолдады. Сонымен бірге, оңшыл популистік «Германия үшін балама» партиясының фракция жетекшісі Тино Хрупалла Украинаға ауыр қару-жарақ жеткізу жөніндегі бірлескен парламенттік бастаманы «соғысқа кірісу туралы декларация» деп атады. Ол Германия Ресеймен соғыс жағдайында емес екендігін нақтылады. Оның айтуынша, немістердің көпшілігі мұны қаламайды. Бұған қоса, Хрупалла Украинамен де, Ресеймен де жақсы қарым-қатынаста болу Германияның мүддесіне сай екенін атап өтті.
