Дзюдодан Азия чемпионаты: Қазақстан құрамасы нешінші орында?

Елордада өтіп жатқан дзюдодан Азия біріншілігінің екінші жарыс күнінен кейін ел құрамасы жалпы командалық есепте қай орында келе жатқаны анықталды деп хабарлады turkystan.kz ҚазАқпаратқа сілтеме жасап. Осыған дейін қазақстандық спортшылар 1 алтын, 1 күміс, 2 қола медаль алды. Нәтижесінде, олар жалпы командалық есепте төртінші орында тұр. Ел құрамасынан Данияр Шамшаев (73 келі) алтын, Абиба Абужақынова (48 келі) күміс, Мағжан Шәмшадин мен Ғұсман Қырғызбаев (66 келі) қола медаль алды. Жапония 8 (5-3-0) медальмен бірінші орында келеді. Одан кейінгі орындардағы Моңғолияның 5 (2-0-3), Өзбекстанның 7 (1-2-4) медалі бар. Айта кетерлігі, екінші жарыс күніндегі нәтиже бойынша барлығы тоғыз елден балуандар жүлдеге қол жеткізді. Олардың қатарына аталған құрамалардан өзге Оңтүстік Корея, Қытай, Тәжікстан, Тайван, Қырғыз Республикасы, Біріккен Араб Әмірлігі спортшылары енгізілген. Айта кетейік, құрлықтық дода 7 тамыз күні мәресіне жетеді. Жекелей сынның соңғы жарыс күнінде ерлер арасында 90, 100 және 100-ден жоғары салмақтағы балуандар, әйелдер арасында 78 және 78 келіден жоғары салмақтағы спортшылар белдеседі. Аталған додада Азияның 19 елінен келген 200-ден астам балуан 14 салмақта бақ сынап жатыр. Олардың қатарында еліміздің атынан 18 балуан қатысып жатыр.    

Серіктес жаңалықтары