Мәсі-кебісімізді шетелдегі қандастарымыз тігіп беріп отыр – кәсіпкер

Бақытбек Мұхаметғазы – Қытайда туып-өскен қандасымыз. Елге 2018 жылы көшіп келген. Бүгінде өз кәсібі бар. Ол суық жерде жұмыс істейтін жандардың аяғын жылытып жүр. Қалай дейсіз ғой? Таза былғарыдан жасалған мәсі, кебіс сатуды қолға алған. «Мәсі-кебісті қолдан тігіп беріп жатқан – Қытайдағы қазақ бауырларымыз» дейді ол. Басында 5-10 дана әкеліп базарларда сатқан. Сұраныс ойдағыдай болған соң біртіндеп көбейте бастады. Өйткені қақаған суықта далада жұмыс істейтін жандар үшін бұл таптырмас дүние. Аяқтан суық өтпейді. Базарда жұмыс істейтіндерден басқа да тұрақты клиенттері бар. Олар: көлік жуу тұрағында жұмыс істейтін жігіттер, автоэлектриктер және ата-әжелер.

«Әр жылы күзге қарай алдырып, 15-20-дан санын көбейтіп отырдық. Қыстай, көктем шыққанша сатып шығамыз. Енді кәсібімізді үлкейтіп, дүкен ашып жатырмыз. Мемлекеттік бағдарламалар арқылы өсімі төмен несие алып, кәсібімізді кеңейтуді қолға алдық. Биыл 100 данасын алдырдық. Қазірден бастап мал базарларда сатылып жатыр. Суық жерде жүретіндер таза былғарыдан жасалған, ішінде қой терісінен жасалған ұлтарағы бар, қолдан тігілген мәсілерге қызығады», – дейді Бақытбек Мұхаметғазы.

Кейіпкеріміз өнімдерін еліміздің әр қаласына жібереді: Алматы, Нұр-Сұлтан, Қарағанды, Ақтау, Түркістан, Тараз. Бағасы да қолжетімді. «Сұраныс жылдан-жылға көбейіп келе жатыр» дейді.  

«Жазда арзан болады. Ол жақта жазда көп өтпейді. Қысқа қарай жақсы бағамен сатамыз. Тұтынушылардың көбі егде тартқан кісілер. Қытайдан келген әйел адамдар көбіне үй жұмысымен айналысады. Ауыл жақта жағдай бола бермейді ғой. Жылы еден жоқ. Малға шығады. Жер үйде тұратындықтан мәсі, кебіс керек. Ата-апаларымыз тұрақты алып тұрады. Тойға да киіп барады. Бір мәсі, кебісті 2-3 жыл киеді. Әртүрлі түсі бар. Табанында сиырдың жон терілері қабатталған. Кішігірім өкшесі бар. Қыста суық, ызғар өтпейді. Негізі барлық жастағы адамдарға бар. Бірақ үлкен кісілер денсаулықтың қадірін жақсы біледі ғой», – дейді кейіпкеріміз.

Ол қандай кәсіпті қолға алсаңыз да, алдымен идеяны әбден пісіріп алған жөн екенін айтады. Әрине, сосын кәсібіңізге деген қызығушылық та маңызды. Өйткені жақсы көрген іс қана сізді жетістікке жетелейді.

«Мәсі-кебіс тігудің қыр-сырын біліп алғаннан кейін осы жақта өзіміз тіксек деген ой бар. Ол үшін тері илеп, бояп беретін зауыт болуы керек, іздестіріп жатырмыз. Тігетін апараттар алдырамыз.  Кәсіп ашатын адам тәуекелшіл болуы керек. «Алтын шыққан жерді белден қаз» дейді ғой, тек қана алға жүреміз», – дейді Бақытбек Мұхаметғазы.

  Халқымызда «Әрекетке – берекет» деген жақсы сөз бар ғой. Көзін тапқан жанға кәсіптің түрі көп емес пе? Кейіпкерімізге «Кәсібіңіздің нәсібін көріңіз» дедік.      

Серіктес жаңалықтары