50395
Қазақ пен қырғыз «Көкпар» федерацияларының басшылары кездесті
Қазақ пен қырғыз «Көкпар» федерацияларының басшылары кездесті
Астанада ҚР Ұлттық спорт қауымдастығының президенті Исламбек Салжанов пен ҚР «Көкпар» федерациясының президенті Бауыржан Исабаев Қырғыз Республикасы «Көк бөрү» федерациясының президенті Талас Бегалиевпен кездесті деп хабарлады turkystan.kz.
Жиында қатысушылар қордаланған мәселелерді көтеріп, оларды оңтайлы шешу жөнінде, сонымен қатар көкпар спортының дамуы мен ондағы ережелерді бірлесе бекіту жайын талқылады.
Одан бөлек, тараптар келесі жылы Қазақстанда өтетін V-Көшпенділер ойындарын жоғары деңгейде өткізу жоспарын айтып, көкпар ойынын бүкіл әлемге паш ету үшін бірлесе, тығыз жұмыс істеуге келісті.
Сонымен қатар кездесуде қос ел федерациясы көкпар ойындарының біржылдық күнтізбелік жоспарын бекіту және оның өтетін орны мен турнир форматын бекіту, көкпар және көк бөрү ойындарының ережелерін заманауи талаптарға сай етіп жасауда сарапшылар мен тарихшыларды, екі жақтың ғалымдарын бірге жұмылдыруға, сондай-ақ осы жылдың тамыз айында Қырғызстанның Шолпан Ата қаласында көк бөрүден өтетін халықаралық турнирдің форматы қалай болатынын бірге талқылады.
Сондай-ақ бауырлас елдің өкілдері алдағы уақытта екі елде өтетін барлық жолдастық және басқа да жарысқа өз командаларын әкеліп, бір-бірін қолдайтынын жеткізді.
Кездесу соңында тараптар бұдан былай стратегиялық әріптестік орнатып, әлем халықтарының көкпарға деген қызығушылығын бірлесе арттыруға уағдаласты.