50321
Мені босатсаңдар, Ғабидолла Әбдірахимов туралы шындықты айтамын – Рашид Аюпов
Мені босатсаңдар, Ғабидолла Әбдірахимов туралы шындықты айтамын – Рашид Аюпов
Астанадағы қылмыстық істер жөніндегі мамандандырылған аудандық сотында бірнеше аптадан бері Кентау қаласының экс-әкімі Рашид Аюповтың соты болып жатыр. Оған кәсіпкерден 2,8 миллион доллар пара алды деген айып тағылған, деп хабарлады turkystan.kz qonaev.info-ға сілтеме жасап.
Рашид Аюпов 2022 жылдың қазан айында ұсталды. Оны Alageum Group компаниясының иесі – белгілі кәсіпкер Сайдулла Қожабаевтан 2,8 млн теңге пара алды деп айыптап отыр. Бұл қаражат үшін Аюпов тендер ұттырып беруге уәде еткен.
Кәсіпкердің айтуынша, екеуі 2013 жылы танысыпты. Оларды Кентау трансформатор зауытында жұмыс істеген ортақ таныс Бағлан Нұргелдиев таныстырған.
Тергеу хаттамасында көрсетілгендей, аса ірі көлемде пара алған Рашид Аюпов сол ақшаға алдымен Toyota Land Cruiser Prado жол талғамайтын автокөлігін (13,4 млн теңге), Астанадағы BI Village коттедж қалашығынан үй (90 млн теңге) сатып алып, туысының атына жаздырып қойған. Сондай-ақ, бірнеше жүк көлігін де сатып алыпты.
Бұл қылмыстық істе Шымкент қаласының экс-әкімі Ғабидолла Әбдірахимовтың да есімі жиі айтылады. Ол әкім болған кезде Аюпов әкімдіктің аппаратын басқарды. Екеуі де «Болашақ» бағдарламасының түлектері. Ал арыз жазған кәсіпкер осынау ірі соманы Ғабидолла Әбдірахимовтың көмекшісіне бергенін айтады.
«Ақша толы сөмкені осыдан он жыл бұрын кәсіпкер Сайдулла Қожабаевтың ұлы Еркебұлан Ильясов пен Бағлан Нұргелдиев Ғабидолла Әбдірахимовтың көмекшісі Исамидин Қантөреевке әкеліп берген», – делінген тергеу материалында.Сот отырысында кәсіпкердің ұлы Еркебұлан Ильясов пен Рашид Аюповтың әңгімесінің аудиожазбасы тыңдалды. Онда экс-әкім 2,8 миллион доллардан тек 100 мың доллар алғанын анық айтқан. Әңгіме барысында ол арыз бен куәгер сөзінен өзін және Бағлан Нұргелдиевті алып тастауды бірнеше рет сұрайды. Есесіне Ғабидолла Әбдірахимовке қатысты компромат беруді ұсынады. Оның сөзінше, Әбдірахимовтың да «арты таза емес», оның заңсыз алған нысандары мен фирмалары бар көрінеді.
«Міне қара, шынымды айтамын, мен тек 100 мың доллар ғана алдым, мен ол ақшаны орнына қоямын. Әбдірахимовты отырғызу оңай, ол үшін бірақ мені және Бағланды бұл істен алып тастаңдар», – дейді Рашид Аюпов кәсіпкердің ұлына.Сотқа қатысқан Еркебұлан Ильясов болса, Аюпов тарапынан Әбдірахимовке қатысты төрт рет ұсыныс түскенін айтты. Дегенмен, сотталушының өзі болса, бұл сөздерді айтпағанын, Әбдірахимовке қарсы куәлік бермейтінін мәлімдеді.
