«Қазақконцерт» әртістері АҚШ-та өнер көрсетті
«Қазақконцерт» әртістері АҚШ-та өнер көрсетті. Saz&Soul тобы Хьюстондағы Warehouse LIVE сахнасында жеке концерт қойды.
Роза Бағланова атындағы «Қазақконцерт» мемлекеттік академиялық концерттік ұйымының шығармашылық ұжымы танымал халық әндерін, заманауи қазақ музыкасын, күйлерін түрлі стилистикада орындады. Бағдарламада авторлық әндер мен аспаптық шығармалар да болды.
Концерттің ерекше тұсы қазақстандық композитор Тілес Қажығалиевтің 75 жылдығына орай Saz&Soul-дың жаңа аранжировкада өңделген «Мәңгілік махаббат» композициясының орындалуы болды.
Saz&Soul тобының шығармашылығы қазақ халық әндері мен авторлық шығармаларға негізделген. Олардың репертуарынан академиялық музыка, джаз, поп, самба, румба және техно-электронды музыка сияқты түрлі жанрлар мен стильдерді тыңдауға болады.
