"Жемқорлықтан құтылу үшін менің кетуім керек": Жапония премьер-министрі орнын босататынын мәлімдеді
"ЛДП-ның өзгергенін көрсететін алғашқы айқын қадам – менің қызметтен кетуім болмақ".
Жапония премьер-министрі Фумио Кисида партияға төніп тұрған жемқорлық дағдарысынан құтылу үшін партияға жаңа басшы қажет екенін мәлімдеді, деп жазды euronews.com.
Жапонияның Премьер-министрі Фумио Кисида сәрсенбі күні күтпеген жерден қыркүйек айында өтетін партиялық сайлауға қатыспайтынын мәлімдеді. Бұл – Жапонияда жаңа премьер-министр тағайындалады деген сөз.
Кисида 2021 жылы өзінің биліктегі Либералды-демократиялық партиясының (ЛДП) басшысы болып сайланған еді, ал оның үш жылдық мерзімі қыркүйекте аяқталады. Партиялық дауыс беруде жеңіске жеткен адам премьер-министр ретінде оның орнына келеді, өйткені ЛДП парламенттің екі палатасын да бақылауда ұстап отыр.
"ЛДП-ның жаңарғанын анық көрсетуіміз қажет", - деді Кисида сәрсенбі күнгі баспасөз конференциясында. "ЛДП-ның өзгергенін көрсететін үшін алғашқы айқын қадам – менің қызметтен кетуім болмақ".
Партиядағы жемқорлық дағдарысы салдарынан Кисиданың қолдау рейтингі төмендеп, 20%-дан төмен түсті.
Жемқорлық ісі партиялық іс-шараларға сатылған билеттерден жиналған есепке алынбаған саяси қаржыларға қатысты. Бұл іс бойынша 80-нен астам ЛДП депутаттары, негізінен бұрынғы премьер-министр Синдзо Абэ басқарған ірі партиялық фракция мүшелері қатысқан.
