Тұрмыста қолданатын заттардағы пластик миға енуі мүмкін – зерттеу
Ең көп кездескен пластик полипропилен болды.
Жаңа зерттеулер күнделікті қолданылатын заттардағы пластик миға енуі мүмкін екенін көрсетті. Бұл туралы euronews.com жазды. Зерттеу Plastic Soup Foundation және Plastic Health Council ұйымдарының қолдауымен жүргізілген.
Әлем ғалымдары мен белсенділері пластиктің адам денсаулығына әсеріне қарсы шұғыл шаралар қабылдауға шақыруда. Олардың бұл талаптары жақында жарияланған есептен кейін туындады. Есепте ішкі орта микропластикпен ластанудың негізгі көзі болуы мүмкін екені айтылған. Басқаша айтқанда, пластик бөлшектері оңай деммен жұтылады және жылдам миға енуі мүмкін.
Бұл зерттеу Сан-Паулу университеті мен Берлин университетінің профессорлары доктор Таис Мауад пен доктор Луис Фернандо Амато-Лоуренсоның жетекшілігімен жүргізіліп, микропластиктердің мидың төменгі бөлігіндегі иіс баданасынан табылғанын анықтады.
Мұрыннан және иіс баданасынан микропластиктердің табылуы бұл бөлшектердің миға ену жолы ретінде иіс сезу жолы болуы мүмкін деген болжам жасайды. Ғалымдар Сан-Паулу қаласында қайтыс болған 15 адамның миынан алынған 15 үлгінің сегізінен пластик талшықтары мен бөлшектерін тапты.
Ең көп кездескен пластик полипропилен болды. Ол көбінесе киім, азық-түлік қаптамалары және бөтелке өндіруде қолданылады.
Зерттеушілер микропластиктердің диаметрі 10 микрон болған жағдайда, одан да кішкентай нанопластиктердің ағзаға оңай енетінін және оның деңгейі бұрын ойлағаннан әлдеқайда жоғары екенін анықтады.
«Бұл зерттеу иіс сезу жолы пластиктің миға енуінің негізгі жолы болуы мүмкін екенін көрсетті, яғни жабық бөлмеде тыныс алу миға пластиктің түсуінің негізгі көзі болуы мүмкін», – деді Сан-Паулу университетінің жетекші зерттеушісі профессор Таис Мауад. - «Нанопластиктердің ағзаға оңай енуі бізді алаңдатады. Мұндай бөлшектердің жасушаларға сіңу қабілеті және олардың ағзамыздың жұмысын өзгерту мүмкіндігі қауіп тудырады».
Зерттеушілер бұл бөлшектердің жасушаларға ену қабілетіне ерекше алаңдаушылық білдіруде. Бұл балалардың ағзаларына әсер етуі мүмкін, яғни олардың ересек өмірінде де белгілі бір өзгерістер туындауы ықтимал.
