Эболаға ұқсас: Марбург вирусынан қаза тапқандар саны өсіп келеді

Руандада Марбург вирусынан қайтыс болғандардың саны 11 адамға жетті, деп хабарлайды euronews.com.

Бұл вирус Эбола қызбасына ұқсас геморрагиялық қызба тудырады. Африка елінде індеттен 11 адам қайтыс болғандықтан, Руанда Марбург вирусының өршуімен күресуді жалғастыруда.

Руанда үкіметінің соңғы мәліметтеріне сәйкес, вирус жұқтырған 36 жағдай расталды, 25 адам оқшауланған.

Руандада аурудың өршуі туралы хабар алғаш рет 27 қыркүйекте жарияланған болатын. Сол кезде ел билігі вирус медицина мекемелерінің науқастарынан анықталғанын мәлімдеді, ал «инфекцияның қайнар көзін анықтау үшін тергеу жүргізілуде» деп хабарлады. Бірнеше күннен кейін де инфекцияның неден тарағаны белгісіз болып қалып, қорқыныш үдей түсті. Жергілікті денсаулық сақтау органдарының мәліметтері бойынша, Марбург вирусы расталған адамдармен байланыста болған 300-ден астам адам анықталған.