Астананың үздік жастары анықталды
Осы аптада елордадағы Сервис және туризм колледжінде «Астана Жастары» жастар ресурстық орталығы, қалалық Білім басқармасы және Астана қаласының әдістемелік орталығының ұйымдастыруымен «Үздік-2024» қалалық байқауының ашылу салтанаты өтті.
Байқаудың мақсаты – жұмысшы мамандықтар мен олардың кәсіптерінің маңыздылығы мен беделін арттыру, кәсіптік оқытудың озық тәжірибесін насихаттау, жұмыс берушілердің назарын қаланың кәсіптік білім беру жүйесінде жұмысшы кадрларды даярлауға тарту және түлектерді жұмысқа орналастыруға жәрдемдесу, жастарды Астана қаласы экономикасының нақты секторларына бағыттау.
– Кәсіби шеберлікке арналған «Үздік-2024» қалалық конкурсы биыл үшінші рет өткізіліп отыр. Ал колледж студенттері екінші жыл қатысып жатыр. Былтыр 5 құзыреттілік бойынша қатысса, биыл 25 құзырет бойынша көшбасшылар анықталады. Бүгінде қоғамда жұмысшы мамандарға сұраныспен қатар құрмет те артып келеді. Осы жолы жоғары сұранысқа ие мамандықтарды таңдап алдық. Байқауға оқитын және жұмыс істейтін, жасы 22-ге толмаған жастар қатыса алады. Олардың арасында WorldSkills чемпионатына қатысушылар да бар. Осы жиын қарашада өтетін WorldSkills чемпионатына дайындық кезеңі десек те болады. Өйткені дәл бүгін жастар өздерінің дағдыларын, біліктіліктерін таразылап, күшті және әлсіз жақтарын анықтай алады. Жастарымыздың жоғары нәтиже көрсеткені бізді қуантады. Жыл сайын «Үздік-2024» қалалық байқауы жастар арасында танымал болып келеді. Бұл жай ғана бәсекелестік емес, жұмысшы мамандықтарға көзқарасты өзгерту мен кәсіби шеберлікті дамыту үшін қолайлы орта құруға бағытталған ауқымды бастама, – деді Астана қаласы Білім басқармасының техникалық және кәсіптік білім беру бөлімінің басшысы Ақмарал Хон.
9-31 қазан аралығында 10 колледжде 25 құзырет бойынша көшбасшылар анықталады, оған кірпіш қалау, кондитерлік іс, жеңіл автомобильдерді жөндеу және қызмет көрсету, мейрамхана сервисі, дәнекерлеу технологиялары, наубайхана шеберлігі, құрғақ құрылыс және сылақ жұмыстары, IT бизнес шешімдері, шаштараз өнері, аспаздық, сән технологиясы, мобильді қосымшаларды әзірлеу, кескіндеме және сәндік жұмыстар, ағаш ұсталық ісі, кәсіпкерлік, флористика, мектепке дейінгі тәрбие және оқыту, лифт электромеханигі, жиһаз өндірісі, электргазбен дәнекерлеу және т.б. салалары кіреді.
– Конкурс студенттер мен жұмыс істейтін жастар арасында тәжірибе алмасу платформасын құруға, сондай-ақ, қалада жұмысшы мамандықтарының жоғары сұранысын көрсетуге арналған. Қатысушылардың бағалануы CS бағдарламасын пайдалану арқылы жүргізіледі, бұл бәсекелестіктің әділдігін және бағалау процесінің ашықтығын қамтамасыз етеді, – деді «Астана жастары» жастар ресурстық орталығының жетекшісі Әлфараби Аймақ.
Байқау жастарды оқыту мен дамыту үшін ерекше мүмкіндіктер жасайды. Бәсекеге барлығы 300 адам қатысып отыр.
– Мен өз талантымды көрсетуге және тәжірибе алмасуға келдім. Конкурсқа дайындық барысында трендтерді зерттеп, материалдармен жұмыс істеп, түстер мен формалармен тәжірибе жасадым. Алдағы уақытта дағдыларымды дамыту, жаңа техникаларды үйрену және жобалармен жұмыс істеуді жоспарлап отырмын. Халықаралық конкурстарға қатысып, өз студиямды ашсам деген жоспарым бар. Дағдыларды дамыту шығармашылық үшін жаңа мүмкіндіктер ашады, ал жеңіс артықтық етпейді, – деді колледж студенті Балтабай Ержан.
Іс-шараның қорытындысы бойынша үш жеңімпаз анықталып, оларға грамоталар мен сыйлықтар табыс етіледі, бұл олардың одан ары жетістіктері үшін қосымша ынталандыру болады.
А.БИМЕНДИЕВА
