Ақтөбелік ер адам студенттерді 5 млн теңгеге алдап соққан
Сот үкімі заңды күшіне енген жоқ
Ақтөбеде грант уәде еткен алаяқ студенттерді алдап, 5 миллион теңге иемденген, деп хабарлады turkystan.kz halyq uni-не сілтеме жасап.
Сайт жазуынша, Ақтөбе қаласында университеттерде грантқа түсіруге уәде берген ер адам студенттерді алдап, 5 миллион теңге жымқырған.
Ақтөбе қаласының №2 соты осы алаяқтық ісі бойынша қылмыстық істі қараған.
2024 жылдың қаңтарында ер адам өзінде түрлі салада таныстары бар екенін және университеттерге грантқа түсіруге мүмкіндік бар екенін айтып, жалған ақпарат таратқан. Жәбірленушілердің сеніміне кіріп, ол ақша талап еткен. Кейін ақшаны қолма-қол шешіп алып, анасының шотына аударған. Нәтижесінде үш жәбірленушіге 5 миллион теңге көлемінде материалдық шығын келтірілген, – деп жазылған сот құжатында.
Ер адам кінәсін толық мойындап, жәбірленушілерден кешірім сұрап, оларға келген шығынды толық өтеген. Жәбірленушілер оны кешірген.
Сот оны кінәлі деп танып, үш жыл мерзімге бостандығын шектеу жазасын тағайындады. Сонымен қатар, жылына 100 сағат мәжбүрлі еңбекке тарту туралы шешім шығарған. Жұмыс орындарын жергілікті атқарушы органдар анықтайды.
Сот үкімі заңды күшіне енген жоқ.
