Астанада үйден өрт шығып, төрт бала көз жұмды

Астанада жеке үйде болған өрттен төрт бала қаза тапты, деп хабарлады елордалық ТЖД баспасөз қызметі.

Қайғылы оқиға таңертең ерте болды. Жеке екі қабатты тұрғын үйдің шатырынан өрт шығып, оның бір бөлігі құлады.

"Құтқарушылар хабар түскеннен кейін 6 минут ішінде жетіп, өртті анықтады. Өрт алдын ала есеп бойынша 500 шаршы метр аумақта оқшауланып, толық сөндірілді. Өрт салдарынан 2011, 2015, 2021 және 2022 жылдары туған төрт бала қаза тапты", – делінген хабарламада.

Оқиғаның себептері анықталып жатыр. Сот-медициналық сараптама тағайындалды. Қаза тапқандардың жақындарына Астана ТЖД мен Төтенше жағдайлар медицинасы орталығының психологтары көмек көрсетуде.