Павлодарда жол апатынан 16 жастағы қыз қаза тапты
Тағы екі жолаушы мен жүргізуші ауруханада жатыр.
Павлодарда көлік ағашқа соғылып, 16 жастағы қыз қаза тапты. Тағы екі жолаушы мен жүргізуші ауруханада жатыр, деп хабарлады turkystan.kz сайты Pavlodarnews.kz-ке сілтеме жасап.
Облыстық полиция департаментінің мәлімдеуінше, оқиға 24 қараша күні сағат 03:10 шамасында болған.
– Мерседес-Бенц маркалы автокөліктің жүргізушісі Нұрсұлтан Назарбаев даңғылымен жүріп келе жатып, қауіпсіз қозғалыс жылдамдығын таңдамай, сырғанауға жол беріп, бордюр тасқа соғылған. Әрі қарай, ол қозғалысты жалғастырып, ағашқа соғылды, – деді департаментте.
Жол-көлік оқиғасы салдарынан ауыр жарақаттармен 2005 жылы туған жас жігіт – жүргізуші мен 2008 және 2009 жылы туған екі қыз №1 қалалық ауруханасына жеткізілді. Тағы бір 14 жастағы жасөспірім облыстық балалар ауруханасына жатқызылды. Бірақ, 16 жастағы қыз бала алған жарақаттар салдарынан ауруханада қайтыс болды.
– 15 жастағы қыз балаға ота жасалды. Қазір ол өте ауыр жағдайда реанимация бөлімшесінде жатыр. Ал 14 жастағы баланың өміріне қауіп жоқ, – деді деді бала құқықтары жөніндегі өңірлік уәкілі Сәуле Шәкенова.
Аталған факті бойынша полиция тексеру жүргізіп жатыр.
Тексеру нәтижелері бойынша кәмелетке толмағандардың заңды өкілдерінің еріп жүруінсіз түнгі уақытта тұрғын үйден тыс жерде болуына жол берген ата-аналарға құқықтық баға берілетін болады.
