Мазмұны
Оңтүстік Кореяның оңтүстік-шығыс аймағында бірнеше орман өрттері әлі де жалғасып, кемінде 24 адамның өмірін қиған, деп хабарлады turkystan.kz.
Билік мәліметі бойынша, қаза болғандардың басым бөлігі 60-70 жастағы азаматтар. Сонымен қатар, 26 адам жарақат алған, оның 12-сі ауыр жағдайда. Өрттер 23 мыңнан астам тұрғынды үйлерін тастауға мәжбүр етті.
Президент міндетін атқарушы Хан Дук Су бұл апатты оқиғаны ел тарихындағы ең ірі өрт деп атап өтті. Өрт салдарынан 1 300 жылдық тарихы бар Уйсоң қаласындағы Гоунса ғибадатханасы толығымен жанып кеткен. Құнды мәдени мұралар қауіпсіз жерге көшірілген.
Билік мәліметіне қарағанда, өрттің алғашқы ошағы жұма күні түстен кейін Санчхон уезінде басталып, кейін Уйсоң уезіне тараған. Йонхап агенттігі күшті әрі құрғақ желдің салдарынан өрттің көршілес Андон, Чхонсон, Ёнян және Ёндеок уездеріне қарай жылжып жатқанын хабарлады.
Ұлттық орман ғылымы институтының маманы Ли Бён Ду Уйсоңдағы өрттің өте жылдам таралып жатқанын айтып, оны "елестету мүмкін емес" деп сипаттады.
Сәрсенбі күні түскі уақытта Уйсоң уезінің таулы аймағында өрт сөндіруге шыққан тікұшақ апатқа ұшырады. Билік бұл оқиғаның себебін тергеуде.
Өртпен күресуге мыңдаған өрт сөндіруші мен 5 мыңнан астам әскери қызметкер тартылды. Сонымен қатар, Кореядағы АҚШ әскери базасынан тікұшақтар да жұмылдырылған.
