Мазмұны
Кофені қай уақытта ішкеніңіз денсаулық пен өмір сүру ұзақтығына ықпал етуі мүмкін. European Heart Journal журналында жарияланған жаңа зерттеу таңертең кофе ішетін адамдардың жүрек-қан тамырлары ауруларынан және жалпы өлім қаупі төмен болатынын көрсетті.
Бұған дейін көптеген зерттеулер қалыпты мөлшердегі кофе жүрек саулығына пайдалы екенін анықтаған. Алайда, кофе ішудің нақты уақыты туралы деректер аз болатын. Бұл жолы ғалымдар кофе ішудің тек мөлшері ғана емес, уақыты да маңызды болуы мүмкін деген қорытындыға келді.
Таңғы кофе – пайдалырақ
Зерттеу авторы, Тулейн университетінің профессоры Лу Ци:
«Кофе ішу ұйқы, мелатонин және кортизол сияқты гормондарға әсер етіп, циркадтық ырғақты өзгерте алады. Сондықтан оның уақыты денсаулыққа тікелей ықпал етуі мүмкін».
Зерттеушілер АҚШ-тағы National Health and Nutrition Examination Survey деректерін талдады. 1999-2018 жылдар аралығында жиналған мәліметтерге 40 мыңнан астам адамның тамақтану мен кофе ішу әдеттері кірді.
Ғалымдар қатысушыларды үш топқа бөлді:
-
Кофені таңғы 4-тен түскі 12-ге дейін ішетіндер
-
Кофені күн бойы ішетіндер
-
Кофе ішпейтіндер
Нәтижелер қандай болды?
-
Таңертең кофе ішетіндер зерттеу кезеңінде кез келген себептен қайтыс болу қаупін 16%-ға азайтты.
-
Жүрек-қан тамырлары ауруларынан болатын өлім 31%-ға төмендеді.
-
Ал күн бойы кофе ішетіндерде мұндай әсер байқалмады.
Сондай-ақ, кофе ішуді көбейткен сайын таңғы кофешілердің денсаулығына оң әсері де арта түскені анықталды. Бірақ күн бойы ішетіндер үшін кофе мөлшерінің ешқандай әсері болмаған.
Бұған не себеп?
Ғалымдар бұл құбылысты екі фактормен түсіндіреді:
-
Циркадтық ырғақтың бұзылуы. Кешкі кофе мелатонин өндірісін тежейді де, ұйқы сапасын нашарлатады, ал бұл қан қысымы мен қабынуды арттырады.
-
Қабынуға қарсы әсері. Кофедегі пайдалы заттар қабынуды азайтады, ал қабыну белгілері ең жоғары таңертең байқалатындықтан, дәл осы уақытта ішкен кофе жақсы нәтиже береді.
Дегенмен, зерттеу авторлары бұл бақылау ғана екенін, ал нақты себеп-салдар байланысын клиникалық зерттеулер арқылы дәлелдеу керектігін айтады.
Лу Ци:
«Болашақта кофе ішу уақыты мен денсаулық арасындағы себептік байланысты арнайы зерттеулер арқылы анықтауды жоспарлап отырмыз».
