Мазмұны
Оксфорд ағылшын сөздігіне (OED) «аударылмайтын» жаңа сөздер енгізілді. Олардың қатарында филиппиннің «gigil» сөзі де бар.
«Gigil» – аса сүйкімді нәрсені, мысалы, кішкентай бала немесе интернеттегі мысықтың видеосын көргенде, күлімдеп, құшақтап алуға итермелейтін сезім.
Тізімге сондай-ақ сингапурдың және малайзияның «alamak» сөзі енді. Ол таңданысты немесе ашуды білдіретін ауызекі сөз.
OED тіл мамандары жаңа сөздердің ағылшын тіліне басқа тілдерден енетінін атап өтті. «Адамдар белгілі бір ұғымды сипаттайтын сөз ағылшын тілінде жоқ болған кезде, оны басқа тілден алады. Уақыт өте келе мұндай сөздер күнделікті қолданысқа енеді», – делінген OED жаңартуларында.
Сингапур мен Малайзиядан қосылған сөздердің көбісі – ұлттық тағам атаулары. Ағылшын сөздігіне енген жаңа гастрономиялық терминдер арасында «kaya toast» (кокос сүті, жұмыртқа, қант және пандан жапырағынан жасалған тосап жағып берілетін тостер наны), «fish head curry» (тамаринд негізінде дайындалған, қытай және оңтүстік үнді асханасының элементтерін біріктіретін балық басынан жасалған карри) және «steamboat» (қайнаған сорпада піскен жұқа туралған ет пен көкөністерден тұратын тағам) бар.
Филиппиннің жаңа сөздерінің қатарында ұлттық ойын-сауық түрі – «videoke» (караокенің ұпай жүйесі бар нұсқасы) және фермерлер жиі қолданатын «salakot» (жеңіл, кең жиекті бас киім) сөздері бар.
Сондай-ақ, ағылшын тіліндегі бар сөздерге ерекше мағына беретін жаңа қолданулар да тіркелді. Мысалы, «terror» сөзі кейде талапшыл немесе қатал мұғалімдерді сипаттау үшін қолданылады.
OED қазіргі уақытта 600 000-нан астам сөзді қамтиды және жыл сайын мыңдаған жаңа сөздерді қарастырады. Биылғы жаңартуға Оңтүстік Африка мен Ирландиядан да жаңа терминдер енді.
