Италиялық инвесторлар Батыс Қазақстан облысына келмек

Италиялық инвесторлар Батыс Қазақстан облысына келмек. Бұл туралы Италияның Милан қаласында БҚО әкімі Алтай Көлгінов бастаған батысқазақстандық делегацияның қатысуымен өткен бизнес-форум кезінде мәлім болды, деп хабарлайды «ҚазАқпарат» тілшісі. Облыс әкімінің баспасөз қызметінен түскен мәліметке қарағанда, Елбасының республикамызға инвестиция тарту жөніндегі тапсырмасына сәйкес ұйымдастырылған форумға «ҚПО б.в.» компаниясының және  италия-қазақ сауда палатасының өкілдері қатысты. Шараға  келген инжи­ни­ринг пен мұнайгаз саласына құрал-жаб­дық шығарумен айналысатын италияндық ірі компаниялардың бас­шыларына Батыс Қазақстан об­лысы экономикасының негізгі салалары, инвестициялық әлеуе­ті, өңірді мұнайгаз кластеріне ба­ғытталған машина жасау орта­лығына айналдыру турасындағы іс-шаралары  таныстырылды. - Мемлекет басшысы өз Жолдауында ауыл шаруашылығы саласын экономиканың драйвері­не айналдыру қажеттілігін айтқан еді. Еліміздің басқа өңірлеріндегі секілді бізде де бұл сала жақсы дамыған. Табиғи, экологиялық та­за өнімдерді шығаруға мүмкіндік мол. Сөйтіп, еліміздің батыс аймағының агроөнеркәсіп өнімде­ріне деген сұранысын толығы­мен қанағаттандыруға болады. Сонымен қатар ЕАЭО мен ЕО елдеріне де азық-түлік экспортының кө­лемі жыл өткен сайын артып келеді. Бұл бағытта шетелдік инвесторлар үшін түрлі жеңілдіктер қа­растырылғанын айта кеткім ке­леді. Сол себепті италияндық кә­сіп­керлерді осы салаға инвестиция салуға шақырамын. Жалпы, шетелдік компаниялардың об­лы­сымызға инвестиция салуға қы­зы­ғушылығы зор. Оған кабельді-сым­ды өнімдер шығарумен айна­лысатын кәсіпорын, жылыжай шаруашылығының құрылысы, за­ман талабына сай келетін жаңа қо­нақүй салу жобалары мысал бола алады. Ресейдің бес бірдей губерниясымен шектесетін және же­дел қарқынмен дамып келе жат­қан облысымызда басқа да түрлі жобалар бар. Бүгінгі шараны пайдаланып, сіз­­дерді және сіздер арқылы өзге де италияндық кәсіпкерлерді Ел­ор­дамызда өтіп жатқан «ЭКСПО-2017» көрмесін тамашалауға және Орал қа­ласында дәстүрлі түрде болатын «WestKazInvest - 2017» форумына да шақырғым келеді. Онда шетел­дік қонақтарға отандық кәсіпкерлермен кездесіп, өзара пікір алмасу, жаңа өнім түрлерін шы­ғару, бірлескен кәсіпорын құру турасында келісіммен уағдаластық жүргізуге барлық жағдай жасалады, - деді Алтай Көлгінов.

Серіктес жаңалықтары