Темірхан Медетбек: Билік пен халықтың арасына алтын көпір болса

Жалпы қоғам­дық негізде ұлттық сипаты бар ұйым­дар­дың құрылып жатқаны бүгін ғана емес. Бұрыннан бар. Осыдан аз ғана уа­қыт Ұлт­тық кеңес деген ұйым құрылды. Ондай ұйым бұрын да болған. Бірақ солардың көбі белгілі бір жағдайда мемлекеттік саясатты жұртқа түсін­діруде, мемлекеттік идеологияға тірек болуға себі тиді демесек, қарапайым халық­тың мұң-мұқтажын айтып, билікті өзімен санас­ты­руға жете қоймаған сияқты. Ақсақалдар сенаты құрылды дегенді естіп жатырмыз. Оның құрамына кірген кісілер де халық білетін тұлғалар. Меніңше, Олжас Сүлейменов те, Мұрат Әуезов те, Төрегелді Шарманов та халыққа жаны ашитын, мемлекеттің болашағы үшін қам жейтін азаматтар. Мәселе қандай да бір ұйым құруда емес, сол ұйымды құрушылардың қара басының абыройынан гөрі, елдің, халықтың жағдайын ойлап, ұлт үшін, мемлекет үшін әділ де белсенді түрде жұмыс істеуінде. Сондықтан олар, бүгінде қарым-қатынасында алшақтық байқа­ла­тын билік пен халықтың арасына алтын көпір болу міндетін атқарып жатса, неге қолдамасқа?! Мемлекетте ашық сынға, сөз еркін­дігіне шектеу болмаса даму болатыны сөзсіз. Халықтың сөзі билікке халықшыл ұйымдар арқылы жетіп жатса, ол да бір ғанибет. Ел әрқашан жаңадан құрылып жатқан қоғамдық ұйымдарға үмітпен қарайды. Өкініштісі, «жанбай жатып сөнетін» ұйым­дар аз емес. Сондықтан белгілі бір бас­та­маны көтергенде, ұйым құрғанда оны ақырына дейін апармаса жұрттың одан көңілі қалып, ондайға сенбейтін болады. Сенім жоқ жерде ешбір іс алға баспайтынын ескеруіміз керек. Осы жайларды ескере келгенде, енді құрылып жатқан Ақсақалдар сенаты жайында әзірге бірдеңе дей алмаймын. Мен де өзге жұрт секілді, олардың алдағы уақыттағы белсенділігіне, ұлт үшін, мем­лекет үшін істеген жұмыс­тарының нәтиже­сіне қарап қана баға бере аламын.

Темірхан МЕДЕТБЕК

ақын, Мемлекеттік сыйлықтың лауреаты

Серіктес жаңалықтары