Қиын кезде қамқорлықтан шет қалмады

Дүниежүзін шарпыған COVID-19 вирусының ке­сі­рі­­нен бейбіт өмірдің ыр­ғағы бұзылды. Індеттің ал­дын алуға байланысты бар­лық жерлерде төтенше жағ­дай режимі жарияланды. Қазақстанның ЖОО-да білім алу үшін келген қандастардың са­ны жылдан-жылға артып келеді. Ол жастардың біразы Солтүстік Қа­зақстан облысы, Петропавл қа­ласы М.Қозыбаев атындағы Сол­түс­тік Қазақстан мемлекеттік уни­верситетінде оқиды. Карантин ре­жимі басталғалы унверситеттің №3 жатақханасында Моңғолия, Қы­тай, Өзбекстан, Ресей елдерінен кел­ген 50 студент тұрып жатыр. Атал­ған жатақханадағы студент­тер­дің жағдайы жақсы, сабақ­тарын студенттер үйінен шықпай оқуға мүмкіндік бар. Сонымен қатар академиялық ұтқырлықпен келіп, еліне қайта алмаған 3 сту­дент те осы жатақханаға орна­лас­ты­­­рылған. Олардың да жағдайы жақсы. Ата-аналарының аялы алақа­ны­нан алыс жүрген қандастардың тұр­мыс-тіршілігі мен күнделікті азық-түлік алуына қамқорлық та­ны­тып жатқан азаматтар да бар. Атап айтсақ, Дүниежүзі қазақ­тары­ның қауымдастығы Солтүстік Қа­зақстан облыстық филиалының же­текшісі Арман Сүйіндіков пен «Отан­дастар қоры» жанынан құ­рыл­ған қандастарды ақпараттық қол­дау орталығының СҚО бойын­ша фронт-кеңсесі. Арман Сүйіндіковтің бас­та­ма­сымен облыстағы жаны жайсаң, кә­­сіпкер азаматтар Бүркіт Жұ­ма­баев, Ерлан Сұлтанбеков, Ақеділ Жуа­нышпаев көмек көрсетті. Мем­лекет басшысы Қасым-Жомарт Тоқаевтың бастамасымен жер-жер­де қолдау тауып жатқан #BizBirgemiz акция­сын теріскейлік аза­маттар да қол­дайды. «Осындай қысылтаяң шақта ше­телден келген студенттерге қол ұшын созып, азық-түлікпен қам­та­­­масыз етіп жатқан Солтүстік Қа­­зақстандағы кәсіпкер мыр­за­лар­ға және Арман Сүйіндіков аға­мызға, «Отандастар қорына» ай­тар алғысымыз шексіз», – дейді Моң­ғолиядан келіп  оқып жатқан жур­налистика мамандығының 1-курс студенті Айсұлу Қанат. «Біз қашанда өз қандастары­мыз­ды қолдауға дайынбыз, ата-ана­­ларынан алыс жүрген бауыр­лары­мызға қолдау көрсетіп, «Бір жа­ғадан бас, бір жеңнен қол шы­ғар­масақ» біздің азаматтығы­мыз қайда қалады?» – дейді Дүниежүзі қазақтарының қауымдастығы Сол­түстік Қазақстан облыстық фи­лиалының жетекшісі Арман Сүйіндіков. «Расында да коронавируспен кү­рес жағдайында әлеуметтік кө­мек көрсетіп, қол созу нағыз ер­жүрек­тердің ғана қолынан келетін іс», – дейді Дүниежүзі қазақтары­ның қауымдастығы мен «Отан­дас­тар қоры» Солтүстік Қазақстан об­­лыстық фронт-офисінің сарап­шысы Жазира Көкбас. Сондай-ақ Дүниежүзі қазақ­та­ры­ның қауымдастығы мен «Отан­дастар қоры» Қарағанды облысы  фи­лиалының жетекшісі Меруеш Ба­шай Қарағандыда білім алып жат­қан студенттердің хал-жағ­дайы­мен бөлісті. – Қарағандыдағы Эконо­ми­ка­лық университет – Қазақстандағы беделді жоғары оқу орнының бірі. Университетте шетелден келген қазақ жастары білім алуда. Қазіргі төтенше жағдайға байланысты осын­да ақылы білім алып жатқан сту­дент жастар Дүниежүзі қазақ­тарының қауымдастығы мен «Отан­дастар қорынан» көмек сұ­рап өтініш жолдаған еді. Студенттердің өтінішін ректор Ерқара Аймағамбетов қолға алып, ау­қымды көмек көрсетті. Универ­ситеттен әр студентке 25 мың тең­­­геден қаржылай көмек көр­се­тіп, 2 айға дейін жатақханада тегін тұруына, сонымен қатар азық-түлік және оқуға қажетті құрал-жаб­­дықтармен толықтай қамта­ма­сыз етуге жәрдемдесті. Еліміздегі әрбір университет, колледждерде шет мемлекеттен келіп оқып жат­қан қазақ жастарының жағдайын ерек­ше бақылауға алып, төтенше жағ­дай уақытында барынша қол­дау көрсетілуін сұраймыз, – деді ол.

Серіктес жаңалықтары