"Ернар алаяқтардың құрбаны болды": Мейрамбек Бесбаев әріптестеріне жеңіл табысқа құмартпауды ескертті

"МұзАрт" тобының әншісі, Қазақстан орындаушылар одағының басқарма төрағасы Мейрамбек Бесбаев төтенше жағдай кезінде ұтыс ойынын өткізіп, қамауға алынған әріптесі Ернар Айдардың жағдайы туралы айтып берді. «Қадірлі ағайын! Соңғы күндері қазақтың талантты ұлдарының бірі, белгілі әнші Ернар Айдардың маңайында болып жатқан жағдайдан біршама хабардар шығарсыздар. Мен Ернармен хабарласып, мән-жайды анықтап білдім. Өзі сіздерге толық ақпарат берейін десе, телефоны бұғаттаулы, себебі қазір алаяқтар ұсталып, тергеу амалдары жүріп жатыр. Сондықтан, мен сіздерге болған жағдайды жеткізгелі отырмын", - деп жазды әнші Facebook-тегі парақшасында. Мейрамбек Бесбаевтың айтуынша,  Ернар Айдар алаяқтардың құрығына ілінген. "Бұл жағымсыз жағдайда алданған азаматтармен қатар Ернар бауырымыз да алаяқтардың құрбаны боп отыр. Бүгінгі таңда алаяқтар құрықталды. Ернар өз кезегінде тергеу жұмыстарының әділ жүргізілуіне жан-жақты ақпарат беріп, барынша көмектесіп жатыр", - деді өнер иесі. "МұзАрт" тобының әншісі қазақстандықтарды Ернар Айдардың жағдайына түсіністікпен қарауға, ал өнердегі әріптестерін жеңіл табысқа құмартпауға шақырды. "Қазақта “жаңылмайтын жақ, сүрінбейтін тұяқ жоқ” деген сөз бар. Өнер адамының аңқылдақ ақкөңілдігі кейде осындайда өзін жарға жығатыны да бар. Ол үшін сүйікті ұлдарыңызды қатты сөге көрмеңіздер. Өздеріңіз білесіздер, әнші ұлдарыңыз алдарыңызда талай өнер көрсетіп, қаншама қайырымдылық шаралардың бел ортасында жүрді. Әлі де сіздер үшін қызмет жасап, сахнадан көңілдеріңізді көтереді. Ернар тап болған бұл жағдайға түспес үшін, барша әріптестеріме мұндай жеңіл табысқа құмартпауын ескерткім келеді! Осындай келеңсіз жағдайға түсіп қалған Ернар ініме сабыр тілеп, барша ағайынға Ораза айында кешірімді болуын сұраймын", - деді М.Бесбаев. https://www.instagram.com/p/B_aiEwoDAil/?utm_source=ig_web_copy_link

Серіктес жаңалықтары