344
Өнер академиясының студенттеріне арналған 300 орындық жатақхана құрылысы жоспарға енді
Өнер академиясының студенттеріне арналған 300 орындық жатақхана құрылысы жоспарға енді
Т.Жүргенов атындағы ҚазҰӨА ректоры Ақан Әбдуәлиевтің халық алдында онлайн есеп беру жиыны өтті. Шараға Мәдениет және спорт министрлігі өкілдері, еліміздің жетекші ЖОО ректорлары, театр және өнер мектептері басшылары, БАҚ өкілдері, академия ұжымы, ата-аналар мен студенттер қатысты.
Болашақ мәдениет саласы өкілдерін дайындайтын білім ордасының ректоры А.Әбдуәлиев көпшілік алдында өткен оқу жылында атқарылған жұмыстар жайымен бөлісті. Аталған шара барысында академияның алға қойып отырған жоспарлары да кең ауқымда талқыланды.
Ақан Жылқышыбайұлы Президент Қасым-Жомарт Тоқаевтың «Алдағы 5 жылда кемінде 90 мың жатақхана орны салынуы керек. Жатақхана өте өзекті әрі өмірлік мәні бар мәселе», – деген тапсырмасына орай, Т.Жүргенов атындағы ҚазҰӨА 300 орындық жатақхана салуды бастайтынын жеткізді. Сондай-ақ, ректор өз баяндамасында бірқатар өзгерістерге де тоқталды. Ол өткен оқу жылының басында оқу ісін ұйымдастыру және бақылауды жақсарту үшін оқу процесін мониторинг жасау бөлімі құрылғанын атап өтті. Академияның әкімшілік жұмысын ұйымдастыруды және басқаруды жақсарту үшін Ректор офисі, 1 шілдеден академияда Сыбайлас жемқорлыққа қарсы мәдениетті қалыптастыру бөлімі, 15 мамырдан бастап Қашықтан оқыту бөлімі енгізілгенін жеткізді.
Аталмыш жиын барысында оған қатысу мүмкіндігімен қатар, ректорға сауал жолдауға да жағдай туғызылған. Әлеуметтік желілер арқылы есеп беру жиынының уақыты мен өтетін платформалары, сұрақтар қоюға арналған байланыс нөмірлері алдын ала хабарланған.
