«ҚазАвтоЖол» жергілікті жұртпен жұмыс істеуге дайын

Тараз қаласында «Қайнар-Тараз» жол учаскесінде төлем қабылдаудың ашық жүйесін енгізу мәселелері бойынша қоғамдық талқылау өтті. Бұған дейін осы жол учаскесінде талқылау Жамбыл облысының Қордай, Меркі, Т.Рысқұлов және Байзақ ауданында ұйымдастырылған болатын. Тұрғындармен кездесуде «ҚазАвтоЖол» ҰК» АҚ мамандары «Нұрлы Жол» бағдарламасына сәйкес, 2020-2025 жылдары Қазақстанда қауіпсіз және жайлы ақылы автожол желісін дамыту жоспарын баяндады. Соған сәйкес жақын арада «Қайнар-Тараз» тас жолында төлем қабылдаудың «ашық жүйесі» іске қосылмақ. «ҚазАвтоЖол» ҰК» АҚ мамандарының айтуынша, төлем қабылдау жүйесі енгізілген жолдарда тәулік бойы жолды бақылау, смарт-жүйесінің көмегімен жол қозғалысының қауіпсіздігін қадағалау, төтенше жағдайда жүргізушіге көмектесу, жол қабатын жедел жөндеу және тазарту, жол бойындағы инфрақұрылымды дамыту және т.б. жұмыстар қарқынды жүзеге асырылады дейді. Сондай-ақ, ақылы жолдарда жүргізушілер мен жолаушылардың жайлылығы үшін жанар-жағармай құю стансасы, қонақ үй, дәмхана, дүкен және тегін дәретхана, тазалық бөлмесі т.б. қызметтерді қамтыған демалыс орындары салынуда. Жамбыл облысының тұрғындары республиканың басқа өңіріндегі ақылы автожолдардағы артықшылық пен ақылы жүйенің жұмыс істеу тәртібін білгендіктен, қоғамдық талқылауға көбірек жол бойындағы сервисті жақсарту мен дамытуға қатысты сұрақтарды қойылған. Ең көп қойылатын сұрақтың бірі – «жүргізушілердің демалу алаңынан кәсіпкерлік қызмет үшін орын қалай алуға болады?». ҚР Президентінің тапсырмасына сәйкес «ҚазАвтоЖол» ҰК» АҚ Индустрия және инфрақұрылымдық даму министрлігімен бірлесіп, 2025 жылға дейін 24 мың шақырым республикалық автожолдардың бойын жол сервисімен қамтамасыз етуді жоспарлап отыр. Ұлттық компания демалыс алаңдарын кәсіпкерлерге «жауапты сақтауға» беру тетігін әзірледі және іске қосты. Тек міндетті екі шарт бар: инвестор демалыс алаңының аумағындағы тазалықты қадағалауы тиіс; кәсіпкер орнататын павильондар модульді (демалыс алаңдарында күрделі құрылыстар салуға тыйым салынады) және құрамында санитарлық-гигиеналық торап (жылы дәретхана) болуы тиіс. Сонымен қатар, «ҚазАвтоЖол» тарапынан электр қуатын жеткізу, септик орнату қарастырылған. Кәсіпкерлікті қолдау мақсатында демалыс алаңдарын «жауапты сақтауға» беру өтеусіз (тегін) негізде жүргізіледі. Жауапты сақтауға арналған демалыс алаңын алу үшін инвесторға ұлттық компания сайтындағы «жол бойындағы сервис» бөліміне кіріп, объектілер санатын таңдап, нысан бойынша қарапайым өтінім қалдыру қажет. Сондай-ақ, өтініш беруші республиканың интерактивті картасында қай жерде бос алаңдар барын қарап, таңдай алады. Әрбір нысан бойынша фотосуреттермен толық ақпарат ұсынылған. Мысалы, Жамбыл облысында республикалық маңызы бар жолдарда электр жарығы тартылған 10 демалыс орны бар. Бүгінде оның біреуіне әлеуетті инвестор табылды. Ал қалған 9 демалыс алаңдары бос тұрғанын айта кеткен жөн. Сондықтан «ҚазАвтоЖол» республикалық маңызы бар күре жолдың бойында өз кәсібін ашуға ниетті бизнесмендерді бірігіп жұмыс істеуге шақырады. Бұл ретте, басымдық жергілікті тұрғындарға беріледі.

Серіктес жаңалықтары