51092
Тәуелсіздік күнтізбесі
Тәуелсіздік күнтізбесі
- 1993 жылғы 2 маусымда Қазақстан Республикасы Жоғарғы Кеңесінің «Қазақстан Республикасы Конституциясының жобасы туралы» қаулысы қабылданды.
- 1994 жылғы 1 маусымда жазушы Оралхан Бөкеев тұрған Алматының Жамбыл көшесінде мемориалды тақта орнатылды.
- 1997 жылғы 1 маусымда Францияда жазушы Мұхтар Әуезовтің туғанына 100 жыл толуына арналған Қазақстан күндері өтті.
- 1999 жылғы 2 маусымда Астанадағы көшелердің біріне Алаш қайраткері, ғалым, драматург, жазушы, журналист Қошке Кемеңгерұлының (1896-1937) есімі берілді.
- 2002 жылғы 31 мамырда Елбасы Нұрсұлтан Назарбаев саяси-қуғын сүргін құрбандарына арналған ескерткішті ашты. Ескерткіш XX ғасырдың 30-жылдарында тұтқындарды жаппай ату орны болған Жаңажол елді мекенінде орнатылған.
- 2003 жылғы 30 мамырда Елбасы Нұрсұлтан Назарбаев Санкт-Петербург қаласында қазақтың ұлы ақыны Жамбыл Жабаевтың ескерткішін ашты. Бұл ескерткіш – Қазақстан халқының Петербургтің 300 жылдығына жасаған сыйы.
- 2006 жылғы 30 мамырда Астанада белгілі мемлекет және қоғам қайраткері Қаратай Тұрысов тұрған үйге ескерткіш тақта орнатылды.
- 2007 жылғы 31 мамырда Елбасы Нұрсұлтан Назарбаев Ақмола облысы Целиноград ауданы Ақмол ауылында орналасқан, саяси қуғын-сүргін құрбандарына арналған «Алжир» мемориалдық мұражай кешенінің ашылу рәсіміне қатысты.
- 2011 жылғы 27 мамырда Алматыда ҚР Ұлттық кітапханасында Мұхтар Әуезовтің «Абай жолы» роман-эпопеясының аудиокітабының тұсаукесер рәсімі өтті.
- 2012 жылғы 29 мамырда Қазақстан айтыс пен киіз үй және оның жабдықтарын дайындау өнерін ЮНЕСКО-ның мәдени мұрасының тізіміне енгізу жөнінде ұсыныс жасады.
