Жаңадан сайланған әкім Ақсуат ауылына ұялы байланыс орнатты

ҚР Тәуелсіздігінің 30 жылдығы қарсаңында Теректі ауданына қарасты Ақсуат ауылдық округіне «Beeline» байланыс жүйесінің қондырғысы орнатылды. Ақсуат ауылының тұрғындарына Beeline-нің жетекші мобильді операторы қызмет көрсететіндіктен, ол желіні кеңейту бойынша ауқымды жұмыстар жүргізеді және оған 250 адамнан тұратын шағын ауылдарды қосады. Ақсуат ауылы Орал қаласынан 25 шақырым жерде орналасқан. 628 орындық 2 мектеп және 100-ге жуық бала оқитын 2 бастауыш мектеп бар. Халқы 3 мыңға жуық ауыл бірнеше жыл бойы Beeline мобильді желісіне қол жеткізе алмады. Елбасы Н.Ә. Назарбаевтың «Болашаққа бағдар: Рухани жаңғыру» мақаласындағы «Туған жер» бағдарламасы аясында қолға алынған жобаны ауыл халқы асыға күткен болатын. Сайланған округ әкімі Жаннұр Ахметов өзінің сайлауалды бағдарламасында ауыл тұрғындарының үгіт-насихат жұмыстарын жүргізу кезінде жинаған барлық аманаттарын қамтыды. Оның айтуынша, ауыл тұрғындары мобильді желіні іске қосуды 5 жылдан астам уақыт күткен. Биыл бұл мәселе бизнес өкілдерінің қаражатын тарту арқылы шешілді.

«Өздеріңіз білетіндей, биыл елімізде алғаш рет ауыл әкімдерінің тікелей сайлауы өтті. Шілде айында сайлау нәтижесі бойынша Ақсуат ауылдық округінің әкімі болып сайландым. Халықпен кездесу барысында адамдар бұл мәселені бірнеше рет көтерді. Осы жылдың жазында мұнараны орнату бойынша жұмыс және оған байланысты қажетті құжаттаманы ресімдеу бойынша мәселелер басталды. Әрине, бұл жұмыс халықтың тікелей қолдауымен және жеке кәсіпкерлердің қолдауымен жүзеге асырылды. Бүгінде Ақсуат ауылдық округінде ауыз су тарту, ауасыз электрмен жабдықтау, газдандыру және жол құрылысы мәселелері шешілді. Мектеп күрделі жөндеуден өтті. Бүгінгі күнге дейін ұялы байланыстың болмауы негізгі проблемалардың бірі болды. Міне, бүгін біз нәтижені көріп отырмыз. Айта кету керек, сайлауалды бағдарлама тікелей халықтың нақты сұраныстарынан тұрады және біз бүгін өз еңбегіміздің жемісін көріп отырмыз. ҚР Тәуелсіздігінің 30 жылдығы қарсаңында бұл мәселенің шешімін тапқандығы қуантады», - деді ауыл әкімі Жаннұр Ахметов.

Жергілікті әкімдіктің жанына 24 метрлік мұнара орнатылып, сигналды күшейту жұмыстары жүргізілді. Бұл ауыл тұрғындарына жақсы қамту аймағы мен жылдамдығы бар Beeline желісінің сапалы мобильді интернетін пайдалануға мүмкіндік береді.

«Біздің мектепте мұғалімдер өте қиналдық. Өйткені, бәрі желіге, бәрі интернетке байланысты және студенттеріміз қиналды, өздерінің сессияларын тапсыра алмай. Ауылдың тұрғындары да, бәрі де керекті нәрсе ғой енді. Сондықтан осы жанайқай естіліп, бүгін керемет күн болды бізде. Осы мұнара орнатылып, бәріміз қуанып жатырмыз», - дейді Ақсуат ауылының тұрғыны Гүлмира Бақбасова.

Қаладан 25 шақырым жердегі Ақсуат ауылының халқын толғандырған мәселелер осылайша рет-ретімен шешімін тауып жатыр. «Жол салынып, ауыз су мен электр жарығынан тарықпасақ та, тек ұялы байланыстан ұятты едік. Бұл мереке алдындағы керемет тарту болды» деседі қуанған тұрғындар. Байланыс жүйесі тартыла бастағаннан бері ауыл азаматтары бірікті. Солардың бірі – Әлібек Айтқалиев.

«Дамыған заманда байланыссыз отыру деген өте қиын. Карантиндік шектеулерге байланысты барлығы онлайн режимге ауысты. Сабақ, жұмыс секілді дүниелер ұялы телефонға байланды. Сол кезеңдерде қиындық туындады. Сапалы байланыс жүйесін қосу керек деп ауыл тұрғындарынан қол жинадым. 400-ден астам адаммен кездесіп, қолдау таптым. Енді ауылға жаңа леп, жаңа жүйе келді. Қуаныштымын», - дейді ол.

Осы қуанышқа орай, тұрғындар жаппай жиналған салтанатты жиында ауыл әкімі Жаннұр Бекбауұлы ауылдың дамуында белсенділік танытқан бірқатар азаматтарды марапаттады. Олардың қатарында «Кәрім» дүкенінің иесі Р.Әлібекұлы, ауыл азаматтары Р.Ақмырзаев пен Ә. Айтқалиевтер бар.

Серіктес жаңалықтары