50301
Қарулы әскеридің қолын алған бүлдіршін жұртты елжіретті
Қарулы әскеридің қолын алған бүлдіршін жұртты елжіретті
Елдегі жаппай тәртіпсіздік кезінде әскери қызметшінің қолын алып тұрған баланың суреті көпшілікті елжіретті, деп хабарлады turkystan.kz.
Фотодағы кейіпкердің кім екені белгілі болды. Ол Ұлттық ұлан «Оңтүстік» өңірлік қолбасшылығына қарасты 6698 әскери бөлімінде қызмет ететін ефрейтор Шахрух Хасанов болып шықты.
Шахрух 4 қаңтарда дабыл белгісімен қызметке келген. Содан Шымкент қалалық әкімдігінің маңына қоғамдық тәртіп пен қауіпсіздікті қамтамасыз етуге шыққан.
«Сурет 7 қаңтарда түсірілді. Әкімдік алдындағы алаңда қызмет атқарып тұрғанымда бір кішкентай балақай жүгіріп келіп, сәлем берді. Баланың қолын алып, басынан сипап, әкесіне қарай жібердім», - дейді Шахрух Хасанов.Ал осы сәтті сол маңайда жүрген «Otyrar tv» журналистері фотоға түсіріп алған. Қазір желі арқылы тараған суреттің анимациялық бейнесі де жасалып, әлеуметтік топтарда кеңінен таралып жатыр.
