Елена Хрусталева: Олимпиадаға қатысатын әрбір спортшы фаворит саналады
Елена Хрусталева: Олимпиадаға қатысатын әрбір спортшы фаворит саналады
– Барлығын қызықтыратын сұрақ: Қазір қайдасыз? Немен айналысып жүрсіз? – Бүгінде Еуропаның жетекші оқу орындарының бірінде магистратура бөлімінде спорт этикасы мамандығы бойынша оқып жатырмын. Мен оқып жатқан Эрасмус бағдарламасының ерекшелігі сол, әр семестрді әр елде оқуға мүмкіндік береді. Халықаралық Олимпиада комитеті Олимпиадаға, өзге де халықаралық жарыстарға қатысқан спортшыларға осы грантты ұтып алуға септігін тигізеді. Былайынша, бұл грантты оқуға құлшынысы мол кез келген талапкер ұтып ала алады. Десе де, бұл оқуға оңай түстім деп айта алмаймын, ұсыныс-хаттар жинап, ағылшыннан тест тапсырдым, сондай-ақ сұхбаттасу процесінен өттім. Сөйтіп, қыркүйек айында грант иегері атанғаным белгілі болды. Бүгінде бірінші семестрді ойдағыдай аяқтап, Алматыда демалыста жүрмін. – Оқуға түскенге дейін ара-тұра спорттық жүріспен, кейіннен пилатеспен кәсіби түрде айналысқаныңызды білеміз. – Иә, үнемі өз бабыңда болған соң спорттан біржола қол үзу қиын. Сол үшін спорттық жүріспен айналысқаным бар. Бұл – бір жағынан пайдалы хобби. Денеңді шынықтырып қана қоймай, бірге жүгіретін достарыңмен көп шүйіркелесуге мүмкіндік береді. Ал пилатеспен әу баста денсаулығымды күтіп ұстау үшін айналысқан едім. Уақыт өте келе менімен бірге жаттыққысы келетіндердің қатары көбейіп, ақыры кәсіби түрде шұғылдануды қолға алдым. Осылайша, ара-тұра жаттықтыру ісімен айналысқанмын. Тіпті, карантин кезінде достарымның өтініші бойынша олардың балаларын жаттықтырған едім. Бірақ қазір оқуыма байланысты бұл жұмыстан қол үздім. – Қазақстан биатлоншылар одағының вице-президентісіз. Онда сізге артылған міндет қандай? – Онда маған жүктелген міндет қоғамдық жұмыспен тығыз байланысты. Көбіне консультациялық көмек көрсетумен айналысамын. Қазір оқуда жүрсем де, ол жақтағы жұмысымды қатар алып жүруге тырысамын. – Елена Хрусталеваның жүлдесі үшін жарыстар өткізіліп тұратын еді, қазір бұл іс тұралап қалған секілді. Ал сіздің есіміңізбен аталатын Олимпиадалық қордың жұмысы ше? – Жоқ, ол сайысты жыл сайын өткізіп тұруға тырысамын. Екі жыл бұрын сондай жарыстардың бірінде Олимпиадалық қор құру туралы идея туындады. Дәл сол уақытта жүлде қорын ұсынатын демеушілер де табыла кетті. «Бұл қорды құруға не себеп болды?» деп сұрасаңыз, қор болса, жарыстар өткізу әлдеқайда оңай. Мақсатым – менің атымды «ұлықтау» үшін жарыстар өткізу емес, қысқы спорт түрлеріне қызыққан барлық балаға ортақ мереке ұйымдастыру. Осы мақсатта көп жұмыс істеуді көздеймін. Оқуымды тәмамдаған соң, елге оралып, бұл істі жалғастырмақпын. – Ертең Бейжіңде басталатын қысқы Олимпиада ойындарында бағын сынайтын біздің биатлоншылардың дайындық жұмысын бақылаған боларсыз. Көпшілік «жасөспірімдер арасында жасындай жарқыраған Галина Вишневская-Шепоренко үздік үштікке ілінсе екен» деп тақымын қысып отыр. – Оқуға түсуіме байланысты олардың бұл басты додаға дайындалу процесін толық бақыладым деп айта алмаймын. Десе де, оқу-жаттығу жиыны жақсы өткенін білемін, олар көп сайысқа қатысты, бірде жоғары нәтиже көрсетіп қуантса, енді бірде керісінше үздіктер қатарынан көріне алмай жүрді. Жалпы, оларды түсінуге болады, өйткені құрамадағы атлеттердің дені – жастар. Ал Галинаның жиған-терген тәжірибесі мол. Оны ересек спортшылар қатарына жатқызуға болады. Ал ересек жастағы атлетке бәрінен қиын. Өз басымнан өткен соң мұны жақсы түсінемін. Өкшеңді басып келе жатқан жастармен бәсекелесу үшін үнемі бабыңда жүруің керек, екі есе жаттығуың қажет. Бірақ құрамадағылар менен жаттығу жиындары туралы ақыл-кеңес сұрамады, сол себепті олар біз айтпасақ та барлығын жақсы біледі деп ойлаймын. – 2018 жылғы Пхенчханда өткен қысқы Олимпиада ойындарында қола жүлдені қанжығалаған фристайлшы Юлия Галышева осы Олимпиадада да атой салады деп сенім артып отырмыз. Әлеуметтік желідегі парақшаңыздан байқағанымдай, Юлия екеуіңіз айнымас дос екенсіздер. Юлиядан басқа да спортшылармен әлі күнге дейін жақсы араласатын секілдісіз. – Иә, Юлия Галышева екеуміз – арамыздан қыл өтпес доспыз. Тек достасып қоймай, ара-тұра оны жаттықтырамын, ақыл-кеңесімді айтамын. Юлияны басты фавориттердің бірі ретінде қарастыратыны айтпаса да түсінікті. Десе де, Олимпиада жолдамасын ұтып алған әрбір атлеттің чемпион атануға мүмкіндігі бар. Төртжылдықтың баст додасында мықтының мықтысы ғана сынға түседі. Дегенмен спорт – болжап болмайтын сала. Нәтижеге қол жеткізуге спортшының сайысқа сақадай-сай болуы ғана әсер етпейді. Қазір біз допингтен емес, ковидтен «қорқатын» заманда өмір сүріп жатырмыз. Қалтаңда жолдама болса да, ПТР-тест оң нәтиже көрсетсе төрт жыл бойы дайындалған жұмысыңның «күлі көкке» ұшады. Ал ол тест тіпті өзіңді жақсы сезінсең де, ойламаған жерден басқа нәтиже беруі мүмкін. Сол үшін ең алдымен барлық қазақстандық спортшы тестілеуден аман-есен өтіп, жарыс алаңына сүрінбей жетсін деп тілейік. Сосын, әлбетте бабы мен бағы келіссін деп тілейік. Тек Юлия ғана емес, Қазақстан атынан қатысатын кез келген спортшы фаворит саналады. Олимпиада үміт артып отырған фристайлшымыз Павел Колмаков биыл Әлем кубогында күміс жүлдегер атанды. Коньки тебушілер мен шорт-трек командасы да жеңіс тұғырына көтерілді. Ал шаңғышылар мен биатлоншыларға сәттілік серік болсын дер едім. Галина нысананы көздеу сайысында жақсы нәтиже көрсете алады, қалған факторлар да үйлесе кетсе екен деп тілеймін. Себебі биатлонда көп нәрсе ауа райына байланысты, кез келген уақытта шаңғы мен винтовка істен шығып қалуы мүмкін, сондықтан техникалық жағы тағы бар. Тіпті, сөре сызығында бір қатарда тұрған қарсыластарың да жарысты сәтті бастауыңа ықпал етеді. Жалпы, қысқы спорт болсын, жазғы спорт болсын, Қазақстан атынан ірі жарыстарға қатысқан спортшылардың нәтижелерін қадағалап отырамын. Олармен бірге қуанып, бірге мұңаямын. Қазақстандық спортшылардың арасында Юлия секілді сенімді серігіме айналған атлеттер көп. Арасында спортпен қош айтысқандары да бар, қазір ел намысын қорғап жүргендері де бар. Сондықтан оларды қай істі қолға алса да, қай жарыста жүрсе де үнемі қолдауға, қолпаштауға тырысамын.
Сұхбаттасқан Әлия ТІЛЕУЖАНҚЫЗЫ
