Ұлыбританияда соңғы 30 жылдағы ең ірі мұнай кеніші барланды

Ағылшын жерінен көлемі 100 млрд. баррельге дейін жететін мұнай қоры табылды. Англияның оңтүстігінде Солтүстік теңізде өндірілген барлық мұнайдан көлемі жағынан асып түсетін кен орны барланғанын кеше ұлыбританиялық UK Oil & Gas Investments (UKOG) мұнай барлау компаниясы хабарлады. UKOG-тың серіктесі, геофизикалық сараптама жасайтын америкалық Nutech компаниясының мәлімдеуінше, жаңа кеніш Лондонның Гэтвик әуежайының маңындағы Horse Hill-1 учаскесінде. Ондағы мұнайдың геологиялық қорын шаршы миліне шаққанда 158 млн. баррельден (шаршы км 61 млн. барр.) келеді екен. «Соған қарағанда, бұл ауданда 50-ден 100 млрд. баррельге дейін мұнай қоры бар дер болжап отырмыз», – депті UKOG бас директоры Стивен Сэндерсон BBC-ге жасаған хабарламасында. Бұл соңғы 30 жылда кәрі құрлықта анықталған ең ірі мұнай кеніші деуге толық негіз бар. «Horse Hill-1 кені геологиялық жағынан АҚШ-тағы Баккен және Батыс Сібірдегі Баженовск қатпарлы тасты коллекторлармен ұқсас», – делінген UKOG баспасөз хабарламасында. Америкалық баламаларымен салыстырғанда, мұнай өндіру коэффициенті 3%-тен 15%-ға дейін құрауы мүмкін. Сэндерсонның айтуынша, мұндай жағдайда 2030 жылға қарай Ұлыбритания мұнайға деген сұранысының 10-30% өндіре алады.