Астанада мектеп директоры күйеуін пышақтап өлтірді

Астанада №65 мектеп директоры әрі мәслихат сайлауына кандидат ретінде тіркелген келіншек күйеуін пышақтап өлтірген. Қайғылы оқиға ерлі-зайыптылардың шаңырағында болған деп хабарлады turkystan.kz. «Информбюро» мәліметінше, қарапайым отбасылық жанжал бір жанұяның қара жамылуына әкеп соққан. 34 жастағы мектеп директоры қаруды қорғану мақсатында пайдаланған. Астананың оң жағалауында орналасқан 65-мектеп ұжымы бүгінде төбелерінен жай түскендей жай кешуде. Өйткені бір айға еңбек демалысына өтініш жазып кеткен директор бар-жоғы алты күннен кейін мұндай ауыр жағдайда қалады деп ойламаған едік дейді. Еңбек өтілі 10 жылдан асатын биология пәнінің мұғалімі, кейіннен директор болған Нұргүл Елекеева өз ісіне тиянақты, жауапты маман дейді бірауыздан мектеп ұжымы.

«Өте еңбекқор, ашық адам. Өз ісін өте жақсы біледі. Ұйымдастырушылық қабілеті өте жоғары деңгейде. Иә, әрине, бұл жақсы жағдай емес. Өзіміз де төбемізден жай түскендей сезімдеміз», – дейді №65 мектеп директорының міндетін атқарушы Гүлназ Токишева.

Отбасылық жанжал мына Ілияс Омаров көшесіндегі үйде шамамен түскі уақытта болған. Құзырлы органдардың айтуынша, әуелі күйеуі пышақпен әйелінің мойнын тіліп өтіп, кейіннен кеуде тұсын жарақаттаған. 34 жастағы келіншек өзін өзі қорғау мақсатында жарына суық қару ала жүгіріп, соңы қайғылы жағдаймен аяқталды. Ал осы үйдің тұрғындары сол күні ешқандай шуды естімегендерін айтады. Қазір мектеп директоры бірнеше дене жарақатымен хирургия бөлімінде жатыр. Операция жасалып, денсаулығы бір қалыпты болған соң тергеу амалдары басталады.

«26 ақпан күні Астана қ. ПД «102» арнасына тұрғын үйдің пәтерінен ер адамның мәйіті табылғаны, пышақ жарақатымен әйел ауруханаға жеткізілгені туралы хабарлама келіп түсті. Аталған фактіге байланысты сотқа дейінгі тергеу амалдары басталды», – деген хат таратты Астана қаласы Полиция департаментінің баспасөз қызметі.

Қажетті сараптамалар тағайындалды. Айта кетейік, мектеп директоры мәслихат депутаттығына кандидат ретінде тіркелген. Енді аймақтық сайлау комиссиясының айтуынша, партия кандидатты өз тізімінен ысыру туралы өтініш хат жолдауға тиіс. Әзірше партия тарапынан мұндай өтініш келіп түспеген.

Серіктес жаңалықтары