«Шымбұлақ» курорты Гиннестің рекордтар кітабына кірді

«Шымбұлақ» тау шаңғысы курорты ресми түрде «Әлемдегі ең биік түнгі тау шаңғы трассасы» номинациясы бойынша Гиннестің рекордтар кітабына кірді деп хабарлады turkystan.kz ҚазАқпаратқа сілтеме жасап. Guinness World Records офисінің судьясы Шейда Субаши-Гемиджи өз сөзінде «Шымбұлақта» болғанына қуанышты екенін айта келе, тау шаңғы курортының бас директоры Ринат Абдрахмановқа әлемдік рекордты растайтын сертификатты табыс етті. Сертификатты тапсыру рәсімі және рекорд нәтижесін ресми тіркеу - теңіз деңгейінен 3200 метр биіктікте «Талғар асуы» станциясында өтті.

«Шымбұлақ» тау курорты әлемдегі ең биік түнгі шаңғы трассасы ретінде ресми түрде Гиннес рекордын алғанын хабарлағаныма қуаныштымын. Бұл - әлемдегі жаңа рекорд», - деді Шейда Субаши-Гемиджи.

Өз кезегінде Ринат Абдрахманов бұл ел үшін маңызды оқиға екенін атап өтті. Оның айтуынша, 5 жыл бұрын шаңғымен түнгі сырғанау жолын ашу оның арманы болған, ал бүгінде арманы шындыққа айналды. Ол жиынға қатысушыларды өз арманына сенуге және алға ұмтылуға шақырды. Салтанатты шараға ҚР Мәдениет және спорт министрі Асхат Оралов, Алматы қаласы әкімінің орынбасары Арман Қырықбаев қатысты.

«Бүгін - тарихи күн. «Шымбұлақ» тау шаңғы курортымыз Гиннестің рекордтар кітабына енді. Бұл - бүкіл ел үшін үлкен жетістік. Әрине, біздің әлеуетіміз зор, «Шымбұлақ» - еліміздегі туризмді дамытудағы негізгі орындардың бірі. Жалпы, қазіргі таңда Мәдениет және спорт министрлігінің қатысуымен нақты қадамдар қабылданып жатыр. Атап айтқанда, елімізде алдағы жеті жылға арналған туризм саласын дамыту тұжырымдамасы әзірленді. Біз жергілікті атқарушы органдармен, серіктестермен, бизнес қоғамдастықпен бірлесіп инфрақұрылымды және туризмімізді дамытатын боламыз», - деді Асхат Оралов.

Шара соңында қызыл лента салтанатты түрде кесіліп, ең биік түнгі тау шаңғысы трассасымен төмен қарай жаппай сырғанау өтті. Айта кетейік, теңіз деңгейінен 3200 метр биіктікте түнгі шаңғымен сырғанау 2021 жылдың қарашасында басталған еді. Осы уақыт ішінде жүздеген мың адам түнгі уақытта ең жоғары нүктеден түсіп үлгерді. Тау шаңғы курорты баспасөз қызметінің хабарлауынша, 2021-2022 жылғы маусымда түнгі шаңғымен сырғанауға 50 346 турист келген, биылғы маусымда 10 есе көп келді, яғни 55 486 турист келді. Сонымен қатар 2021-2022 жылғы маусымда күніне 12 520 адам келсе, биылғы маусымда курортқа 1 миллионнан астам адам келіп үлгерді.

Серіктес жаңалықтары