«Бізде ондай жоқ»: Тұрмысқа шыққан Индира Еділбаева өмірі жайлы айтты

Жақында тұрмысқа шығып, дүркіретіп той жасаған Индира Еділбаева «НТК» арнасына берген сұхбатында өміріндегі өзгерістер жайлы айтты, деп хабарлады turkystan.kz.

«Өмірімде кереметтей өзгеріс жоқ. Себебі біз ата-анамыздан бөлек тұрамыз. Тамақ әзірлеу, киім жуып, үтіктеу маған ұнап жүр. Оған себеп, біріншіден, махаббат. Екіншіден, осындай үй тірліктерімен айналысқым келді. Маған бұл ұнайды», – деді әнші.

«Яғни, сіз үйде орамал тағып, сәлем салмайсыз, солай ма?» деген журналистің сауалына: «Иә, бізде ондай жоқ», – деп жауап берді.

Индира Еділбаева көптен күткен тойына төрт ай дайындалған. 

«Тойды ұйымдастырушылармен ақылдаса отырып жасадым. Көңілімнен шықты. Тойымның қалай өткенін есіме алсам, керемет күйге енемін. «Жарайсың, жақсы істедің» деп өзімді мақтаймын», – деді әнші.

Stan.kz сайтының мәліметінше, өнер иесі шығармашылық жоспарларын да ортаға салды. Индира Еділбаеваның күйеуі Камалдин – медиа-менеджер. Оның айтуынша, жұбайымен болашақта бірге жұмыс істеуге қарсы емес.

«Күйеуіммен болашақта мүмкін бірге жұмыс істейтін шығармыз, алдағы уақытта көре жатармыз. Мүмкін мен «мүлде ән айтқым келмейді» дейтін шығармын. Бірақ олай болады деп ойламаймын», – деді Индира Еділбаева.