Орманшы Айсұлтан
Биыл орманшылар көктем айларында қала сыртына жалпы аумағы 400 гектарға 500 мың ағаш көшетін егіпті.
«Негізі, адам мен табиғат әу бастан бір-біріне етене жақын, үндес болған. Сондықтан болар, көпшілік арасында өзімізді табиғаттың төлі ретінде санайтынымыз бар. Дегенмен біз табиғатты сүйіп, қадірлей алмасақ, оны өз қолымызбен құртып жіберуіміз мүмкін. Сондықтан мен әркез табиғат-анаға жақын болуға тырысамын», – дейді кейіпкеріміз Айсұлтан Аманжолов.
Жас жігіт бүгінде Ақтөбе орман шаруашылығында орманшы болып жұмыс істейді. Оның бұл салада еңбек еткеніне биыл он жыл болған.
– 2013 жылы Ақтөбе ауыл шаруашылығы колледжін «орман шаруашылығы» мамандығы бойынша тәмамдадым. Төрт жылға жуық білім алып, осы мекемеге жұмысқа орналастым. Мұндағы қызметім – орманды өрттен, басқа да апаттардан, сондай-ақ жан-жануарлар мен өсімдіктерді қауіп-қатерден қорғау, орман аумағын қоқыстан тазалау, ағаш егу, көшет отырғызу. Ең алғаш мұнда жұмысқа орналасқанымда орманшылардың жалақысы 27 мың теңге болды. Жалақының аздығына қарамастан өз мамандығымды жақсы көрген соң бәріне төзіп, еңбек еттім. Арада он жыл уақыт өтті, қазір айлығымыз 161 мың теңгеге жетті. Орманшылар қысы-жазы тыным таппайды, жұмысы көп, ал жалақысы аз. Соған қарамастан үздіксіз еңбектеніп жүрген жайымыз бар, – дейді Айсұлтан.
Табиғат жанашырының айтуынша, бұл мамандық зор жауапкершілікті талап етеді. Себебі дала өрттері мен басқа да апаттар болған жағдайда алдымен орманшылар өз аумағын қорғауы керек.
Бүгінде Ақтөбе орман шаруашылығының үш бөлімшесі бар. Олар: Елек, Қарғалы және Ленин орман шаруашылығы. Аталған мекемеде жұмыс істейтін 116 адам осы бөлімшелердің барлығын қорғауға міндетті.
– Қазір бұл мекемелерде 70-ке жуық орманшы бар. Әрбір орманшыға белгілі бір аумақ бөлініп берілген. Мәселен, маған берілген аумақтың көлемі – 296 гектар жер. Мен осы аумақтың әрбір ағашына жауаптымын. Көктем, күз айларында орманды қоқыстан тазалап, тазалық жұмыстарын жүргіземіз. Негізі, табиғатты аялау – әр адамның парызы. Бірақ кейбір жандар мұны түсінбейді. Содан болар орман ішіне таза ауамен тыныстауға келеді де, өздерімен ала келген қоқыстарды жинамайды. Осының салдарынан орманда тұрмыстық қалдықтар көбейеді, – дейді ол.
Қазір Айсұлтан Ақтөбе орман шаруашылығына қарасты Мағаджан тәлімбағында ағаш көшеттерін өсіріп, оларға күтім жасап жүргенін айтады. Биыл орманшылар көктем айларында қала сыртына жалпы аумағы 400 гектарға 500 мың ағаш көшетін егіпті. Қазан айында тағы да ағаш көшеттерін отырғызбақ.
– Өкінішке қарай, орман шаруашылығы мекемесіне қарасты техникалардың саны аз, болса да ақауы көп. Биыл жаңа 4 трактор берілді. Сонда да үлгермей жатырмыз. Біз уақытпен санаспай еңбек етеміз. Қыста да, жазда да ауа райының қолайсыздығына қарамай, орманды аралап, қадағалаймыз. Айта берсең, мәселе көп, дегенмен қанша қиын болса да, өз мамандығымды жақсы көремін, – дейді орманшы.
Еңбекқор, өз жұмысына аса жауапкершілікпен қарайтын Айсұлтан болашақта орманшыларға жағдай жасалса деген тілегін жеткізді.
Әңгіме барысында кейіпкеріміз келіншегінің де орманшы екенін айтып қалды. Сұрасақ, Айдана екеуі осы жерде еңбек етіп жүріп, танысыпты. Олардың отау құрғанына жеті жыл болған. Бүгінде екі бала тәрбиелеп отыр.
– Өзім қарапайым отбасынан шықтым. Әкем құрылысшы болып жұмыс істейді, анам өмірден өткен. Әкем мені әркез адал еңбек еткен адам ғана өз арманына жетеді деп тәрбиеледі. Содан болса керек, өз жұмысымды ұқыпты әрі жауапкершілікпен атқаруға тырысамын, – дейді ол.
Биыл орда бұзар жасқа толған Айсұлтан «Атадан мал қалғанша, тал қалсын» дегендей, Ақтөбенің табиғатын сауықтыру, орманды сақтау, қорғау мен молықтыруға әрі қарай да аянбай еңбек еткісі келетінін айтады.
Облыста орманды сақтау, молықтыру және көбейтуге өз үлесін қосып жүрген жасты былтыр Ауыл шаруашылығы қызметкерлерінің салалық кәсіптік одағы ІІІ дәрежелі «Еңбек даңқы» белгісімен марапаттаған. Сондай-ақ Айсұлтан бірнеше жыл қатарынан облыстық табиғи ресурстар және табиғатты реттеу басқармасының арнайы алғысхатын да алған.
Табиғатқа жанашыр болып, зор жауапкершілік арқалап жүрген жігітке біз де сәттілік, отбасына амандық тілейміз.
Данагүл ҚАЗИХАН,
Ақтөбе облысы
