«Жүре алмайды, әрең сөйлейді»: Ақтөбе облысының бұрынғы әкімі аштық жариялаған
Оған лауазымдық өкілеттігін асыра пайдаланып, жер учаскелерін өз бағасынан төмен сатты деген айып тағылған.
Жерді заңсыз сатқаны үшін сотталып жатқан Ақтөбе облысының бұрынғы әкімі Ермек Имантаев аштық жариялады. Бұрынғы шенеуніктің тамақ пен судан бас тартқанына – жетінші күн. Имантаевтың денсаулығы сыр беріп, сот процесіне қатыса алмайды.
«Бүгін жұбайым Имантаев Ермек Жетпісбайұлының түрмесіне бардым. Ол тіпті жүре алмайды, дәрігерлер оны арбамен алып шыққанын көрдім. Жағдайы өте мүшкіл, әрең сөйлейді. Бірақ есін біледі және оның қылмыстық ісін тергеуді талап етеді. Ол бассыздықтарды көріп, осындай қадамға барды», – деді Имантаевтың жұбайы Лейла Имантаева.
56 жастағы Ермек Имантаев басқа біреудің мүлкін иемденді немесе ысырап етті деп айыпталуда. Тергеу мәліметтері бойынша, Ақтөбе облысының экс-әкімі элиталық ауданда жер учаскесін заңсыз сатты. Бұл жағдайда жер бағасы кадастрлық құннан төмен болды. Залал 100 миллион теңгеге бағаланады.
Имантаевтың өзі кінәні жоққа шығарып, істі қосымша тергеуге қайтаруды талап етеді. Ол аймақты 2002-2004 жылдары басқарды. Көп жанжалдан кейін әкім қызметінен кетті. Кәсіпкерлер оның үстінен шағымданды. 2019 жылы ол Ақтөбеге оралып, жергілікті «Ақтөбе» әлеуметтік-кәсіпкерлік корпорациясының басшысы лауазымына оралды. Дәл сол кезде заңсыз мәміле жасады деп айыпталды.
«Ол істің объективті қаралуын қалайды. Біз бірнеше рет қосымша тергеуді қамтамасыз ету үшін істі жолдау туралы өтініш білдірдік, бұл күдіктілердің барлығын жауапкершілікке тарту үшін қосымша адамдарды тартуға байланысты», – деді Имантаевтың адвокаты Дәурен Алданиязов.
