«AMANAT» әйелдердің қоғамдағы рөлі мен мәртебесін көтеруді көздейді

Бүгін  «AMANAT» партиясы Шымкент қалалық филиалында мегаполистің қоғамдық-саяси өміріне белсенді қатысып жүрген әйелдер қауымының активі өтті. Жиынға партия Хатшысы Шолпан Каринова арнайы қатысып, әйелдер қанаты жұмысының негізгі бағыттарына тоқталды.

«Егемен еліміздің дамуы мен гүлденуіне қыз-келіншектер де лайықты үлес қосып келеді. Бүгінде саясатта, мемлекеттік басқаруда, кәсіпкерлік саласында әйелдердің мүмкіндігі кеңейгенін айта кеткен жөн. Біздің негізгі мақсатымыз – әйел мәртебесін көтеру, олардың ғылымдағы, қоғамдағы рөлін айқындау, отбасылық және тұрмыстық зорлық-зомбылықтың алдын алуға жәрдемдесу. Сондай-ақ, отбасы құндылықтарын дәріптеу, кәсіпкер әйелдерге қолдау көрсету және басқа да бағыттарды қолға алуды көздейміз», - деді партия Хатшысы. 

Жиын барысында «AMANAT» партиясы Шымкент қалалық филиалының төрағасы Бахадыр Нарымбетов әйелдер қауымының қоғамдағы рөлін, олардың әрбір саланы дамыту мен нығайтуға қосқан үлесін айрықша атап өтті. Инклюзивті мәдениет пен гендерлік теңдік қалыптастыру – «AMANAT» басымдықтарының бірі екенін, әйелдің қоғамдағы мәртебесін көтеруде партия жанынан құрылған әйелдер қанатының маңызы зор екеніне тоқталды. Ал филиал Атқарушы хатшысы Жанар Бектаева жиынға қатысушыларға  жобаның мән-маңызын түсіндіріп, бірлесіп жұмыс істеуге шақырды.

«Отбасы құндылығынан бастау алатын мемлекет мүддесінде де қыз-келіншектердің рөлі ерекше. Қазіргі таңда әйелдер қауымы қоғамның барлық саласында табысты қызмет атқарып жүр. Шымкент қаласындағы 30 мыңға жуық партия мүшесінің 68,6 пайызы – әйелдер. Біз әрбір әйелдің еңбегі мен арманына құрметпен қарап, бастамаларын қолдауға әзірміз. Ортақ мақсатқа бірге қадам жасаймыз деп сенемін», - деді Ж.Бектаева.

М.Әуезов атындағы Оңтүстік Қазақстан университеті басқарма төрағасы, фракция мүшесі Дария Қожамжарова білім мен ғылымдағы әйел рөліне назар аударып, көптеген дерек келтірді.

«Соңғы 15 жылда дүниежүзінде әйелдер қауымын ғылымға көбірек тарту бағытында көптеген іс атқарылуда. Ресми мәліметтерге сүйенсек, әлем бойынша ғалым әйелдердің үлесі 30 пайызды құрайды. Біздің елімізде де соңғы уақытта ғалым әйелдердің қатары көбейіп келеді», - деді Д.Қожамжарова.

Сонымен қатар, жиында партия жанындағы аймақтық экономиканы дамыту және кәсіпкерлікті қолдау кеңесінің мүшесі, қалалық «Атамекен» Ұлттық кәсіпкерлер палатасының директоры Сабира Адамбекова, қала әкімдігінің жанындағы Әйелдер істері және отбасылық-демографиялық саясат жөніндегі комиссиясының мүшесі,  қалалық «Іскер әйелдер» қауымдастығының құрылтайшысы Жанетта Жазықбаева және партия мүшесі Балмаржан Нарбекова сөз алып, өз ойларын ортаға салды.

Қаладағы білім, денсаулық, мәдениет, кәсіпкерлік салалары мен үкіметтік емес ұйымдарда табысты қызмет етіп келе жатқан қыз-келіншектермен, көпбалалы аналармен өткен басқосу еркін пікір алмасуға ұласып, түрлі ұсыныс-тілек айтылды.

«AMANAT» партиясының Хатшысы Шолпан Каринова әйелдер қанатының жұмысы аясында бірқатар арнаулы әлеуметтік қызмет көрсету орталығын аралады. Алдымен «Аялы алақан» №5 арнаулы әлеуметтік қызметтер көрсету орталығында болып, қызмет алушылардың жағдайымен танысты. Орталықта психоневрологиялық ауытқуы бар 18 жасқа дейінгі балаларға жартылай стационарлық жағдайда әлеуметтік, тұрмыстық, медициналық, психологиялық, педагогикалық, еңбек, мәдени, және құқықтық қызмет түрлері көрсетіледі. Қазір мұнда 116 бала ем қабылдауда. Дәрігерлер мен әлеуметтік сала қызметкерлері орталықта аптасына 5 күн таңертеңнен кешке дейін түрлі емдік оңалту шараларын көрсетеді. Ғимарат сондай-ақ ЛФК, монтесори кабинеті, тұз шахтасы және толығымен бейнебақылау камераларымен қамтылған. Балалардың ерекшелігіне сәйкес арнайы спорт алаңшасы да бар. 

Келесі кезекте партия Хатшысы Шымкент қаласы жұмыспен қамту және әлеуметтік қорғау басқармасына қарасты №3 арнаулы әлеуметтік қызметтер көрсету орталығына барды. Дағдарыс орталығында тұрмыстық зорлық-зомбылық көрген және адам саудасының құрбаны болған азаматтарға әлеуметтік қолдау көрсетіледі. Жыл басынан бері мұнда 300-ге жуық адам пана тапқан. Орталықта қызмет алушыларға психологиялық және әлеуметтік еңбек, құқықтық көмек сынды 8 түрлі әлеуметтік қызметтер көрсетіледі. Мамандардың сүйемелдеуімен қысқа мерзімдік оқу курсынан өтіп, әрі қарай жұмыс істеуіне де мүмкіндік жасалған.