Бекболат Тілеухан өзіне қатысты қауесеттерге жауап берді

Экс-депутат, Бүкіләлемдік этно-спорт конфедерациясының вице-президенті Бекболат Тілеухан өзіне қатысты қауесеттерге жауап берді, деп хабарлады turkystan.kz Massaget.kz сайтына сілтеме жасап.

Бұл туралы ол журналист Нұрсейіт Жылқышыбайдың «Уақыт көрсетеді» бағдарламасында айтты.

«Ұлттық қауіпсіздік комитетінен шақырту түскен жоқ. Олар ел айта берген нәрсенің бәріне реакция жасай бермейді ғой. Біріншіден, мен онымен (Медет Мұратпаев, - ред.) бетпе-бет жүздестім. Кездескенде «мен сені бірінші рет көріп отырмын ғой» дедім. Ол «Бекболат аға, 2022 жылы қазанда Алматыдағы мейрамханада мен сізге 45 миллион теңге өз қолыммен бердім ғой» деді. Мен тергеушіге «бәрін жазып отырсың ба? Жаз!» дедім. Қазір кісіге сенуден қаласың. Түсінікті ғой, ол өз бетімен айтып отырған жоқ, біреудің жұмсап отырғаны.

Енді қара, 2022 жылғы наурыз бен 2023 жылғы қаңтар арасында Бекболат Тілеухановтың аяғы Қазақстан топырағын басты ма, басқан жоқ па? Мен ол кезде Қазақстанда жоқпын. Ә дегенде өтірік шығып жатыр. Діннің абыройы деген нәрсе бар. «Мына мұсылмандар не болып кетті?» деп айта ма деп, кейбіреулері күмәндана ма деп, Құран ұстап, «ант етейін, Құдай көріп тұр ғой» дегенде, біраз елдің беті қайтты, әйтпесе кейбір туыстарым күмәндана бастады. Жалаға етім үйреніп қалған», - деді ол. 

Осы орайда, ол өзіне қандай жалалар жабылғанын да атап өтті.

- Жеті КамАЗ қару сату адамның ақылына сыя ма? Нанды ел! «Шешесін тігінен көмді», нанды ел. Нұрлан имам ғана соған ара тұрып берді. Жезқазған өңірінде Нұрлан имамға біреу «Бекболат шешесі жұма күні өлсін деп, басына балғамен қағып қалды, сөйтті де ертеңіне тігінен көмді» деген. Нұрлан имам «мен көрдім, оның шешесін жерледім» деген, - деді ол. 

Еске сала кетсек, бұған дейін Бекболат Тілеухан Құран ұстап, өзінің Kausar Travel-ге қатысы жоғын айтқан еді. 

«Жалақорға жауап… Өзіммен-өзім болып, кітабымды жазып, берерлерімді жазбаша түгендеп, бала-шаға, әулеттің қамына ғана көңіл бөліп, намазымды оқып, жасымыз да біразға жетті, басқаның бәрінен бас тартамын деген оймен жүргенмін ғой. Бірақ бүгін осылай елдің алдына шығып сөйлеуге мәжбүр болып отырмын, қажеттіліктен шығып отырмын. Осы уақытқа шейін талай жала жабылды. Қару сатты деді, анасын өлтірді деді, анасын тігінен көмді деді. Оның немене керегі бар? Ән ұрлады деді, Саудиядан қаржы алды деді, Сирияға кісі жіберді деді. Енді не бар?

Біраз жала жапты. Олардың бәріне пәлендей көңіл бөлген жоқпын. Нанар-нанбас, қисынсыз нәрсе. Нанғысы келгендер, нанғандар болды деген сияқты», - дейді Бекболат Тілеухан.