9 жыл іздеуде жүрген: Түркістан облысында шетелдік азамат ұсталды
31 жастағы ер адам Кентау қаласындағы пәтерлердің бірінен ұсталды.
Түркістан облысының полицейлері 9 жыл бойы халықаралық іздеуде жүрген шетелдік азаматты ұстады, деп хабарлады turkystan.kz.
Түркістан облысының полицейлері «Құқықтық тәртіп» жедел-профилактикалық іс-шарасы аясында 9 жылдан бері халықаралық іздеуде жүрген 31 жастағы ер адамды ұстады.
«Анықталғандай, күдікті деп танылған Ресей азаматына есірткіні заңсыз сақтау қылмысы үшін 2014 жылы іздеу жарияланған. Жедел-іздестіру іс-шаралары барысында Кентау қалалық полиция бөлімінің криминалдық полиция қызметкерлері қылмыскердің орналасқан жерін анықтады», – делінген Polisia.kz сайтының хабарламасында.
Одан әрі жедел уәкілдердің жүйелі жүргізілген әрекеттерінің арқасында ер адам Кентау қаласындағы пәтерлердің бірінен ұсталды. Полицейлер оны қалалық полиция бөліміне жеткізді.
Күдікті уақытша ұстау изоляторына қамалды. Оқиғаның барлық мән-жайы анықталып жатыр. Қазіргі уақытта оны экстрадициялау мәселесі шешілуде.
