Астанада қоғамдық көлікпен жүру ақысы қымбаттайды
Жаңа қаулының негізінде автобус құнын 110 теңгеге арттыру ұсынылып отыр.
Елордада автобустардың жолақысын көтеру жоспарлануда. Қаулының жобасы «Ашық НҚА» порталында жарияланды.
Қазір қалалық қоғамдық көліктерде жолақы 90 теңге, енді жаңа қаулының негізінде автобус құнын 110 теңгеге арттыру ұсынылып отыр.
«Қоғамдық көліктермен жолаушылар мен жүк тасымалдауға 110 теңге мөлшерінде бірыңғай тариф белгіленсін», - делінген құжатта.
Қаулы Астана бойынша қала іші мен оның маңына жолаушылар мен жүктерді тасымалдау маршруттарына мынадай мөлшерде сараланған тарифті белгілейді:
- электрондық жол жүру құжаты немесе қосымша электрондық төлем сервистері арқылы қолма-қол ақшасыз төлеу кезінде жолаушылар мен жүктерді қоғамдық көліктермен тасымалдауға -110 теңге;
- электрондық жол жүру құжаты немесе қосымша электрондық төлем сервистері арқылы қолма-қол ақшасыз төлеу кезінде жолаушылар мен жүктер тасымалы -250 теңге;
- электрондық жол жүру құжаты немесе қосымша электрондық төлем сервистері арқылы қолма-қол ақшасыз төлеу кезінде жолаушыларды әлеуметтік маңызы бар орындарға тасымалдауға-110 теңге;
- электрондық жол жүру құжаты немесе қосымша электрондық төлем сервистері арқылы қолма — қол ақшасыз төлеу кезінде жолаушылар мен жүктерді қала маңына қоғамдық көліктермен тасымалдауға – 1 шақырымға 9 теңге 50 тиын;
- қолма-қол ақшамен төлеген кезде жолаушылар мен жүктерді қоғамдық көліктермен тасымалдауға - 220 теңге;
- қолма-қол ақшамен төлеген кезде жолаушылар мен жүктерді қоғамдық көліктермен тасымалдауға-350 теңге;
- қолма-қол ақшамен төлеген кезде жолаушыларды әлеуметтік маңызы бар орындарға тасымалдауға - 220 теңге;
- жолаушылар мен жүктерді қолма-қол ақшамен төлеу кезінде қала маңына қоғамдық көліктермен тасымалдауға – 1 шақырымға 14 теңге.
Сондай-ақ, құжатта электрондық төлем жүйесінен ақау шыққан жағдайда жолаушының тегін жол жүруге құқығы бар екендігі айтылған.
Аталған қаулы жобасы 2024 жылғы 5 наурызға дейін қоғам талқылауына ұсынылып отыр.
