21 мамыр – халықаралық шай күні
Бұл күн шайдың мәдени және экономикалық маңызын көрсетуге, сондай-ақ оны өндіру және саудасына қатысты мәселелерге назар аударуға арналған.
21 мамыр – халықаралық шай күні. Біріккен Ұлттар Ұйымы (БҰҰ) бұл датаны 2019 жылғы желтоқсанда бекіткен. Бұл күн шайдың мәдени және экономикалық маңызын көрсетуге, сондай-ақ оны өндіру және саудасына қатысты мәселелерге назар аударуға арналған.
Шай – әлемдегі ең танымал сусындардың бірі. Оның тарихы ежелгі Қытайдан бастап бірнеше мыңжылдықтарды қамтиды, онда ол тек сусын ретінде ғана емес, сонымен қатар медициналық мақсатта да қолданылған. Шай бүкіл әлемге таралып, әр мәдениетке өзіндік ерекшелік әкелді.
Шай күнін атап өтудің маңызы қандай?
Халықаралық шай күні шағын өндірушілер мен шай индустриясының қызметкерлерін қолдауға бағытталған. Бұл салада көптеген адам жұмыспен қамтылған, әсіресе Үндістан, Қытай, Шри-Ланка, Кения және басқалары сияқты дамушы елдерде осы салада еңбек ететін адамдар өте көп. Дегенмен, олардың көпшілігінде проблема көп, соның ішінде жалақының төмендігі, жұмыс істеуге лайықты жағдай жасалмауы және шайдың өнімділігі мен сапасына әсер ететін климаттың өзгеруі мәселесі. Сонымен қатар, бұл күн шай ішуге байланысты мәдени дәстүрлерді сақтау және насихаттау мақсатында атап өтіледі.
Қандай іс-шаралар өтеді?
Бұл күні бүкіл әлем бойынша түрлі іс-шара, соның ішінде шай рәсімдері, көрмелер, семинарлар мен дәм тату шаралары өткізіледі. Бұл – шайдың алуан түрлілігі, оның тарихы мен дәстүрлері туралы көбірек білуге, сондай-ақ сауда сертификаты бар шай мен экологиялық таза өнімді сатып алу арқылы өндірушілерге қолдау көрсетуге тамаша мүмкіндік.
Халықаралық шай күні бұл сусынның бүкіл әлем үшін қаншалықты маңызды екенін еске салады. Бізді бір кесе шай біріктіреді, мәдени алмасуға және әділ және тұрақты экономиканы қолдауға ықпал етеді.
