ҚазҰУ-дан шыққан қос чемпион

Парижде өтіп жатқан Олимпиада ойындарында құрама қоржынына алтын жүлде салған Елдос Сметов пен қола жүлде иеленген Ғұсман Қырғызбаев – ҚазҰУ түлектері.

Елдос Сметов Биология және биотехнология факультетінде білім алса, Ғұсман Қырғызбаев заң факультетінде білімін жетілдірді.

Елдос Сметов Токио төрінен жеңіспен оралған сәтте білім ордасының басшысы Жансейіт Түймебаев қабылдап, «Ерен еңбегі үшін» медалімен марапаттады. Соңынан студент жастармен кездесу ұйымдастырылып, Қазақстанның еңбек сіңірген спорт шебері бес жасынан  спортпен айналысып келе жатқанын атап өткен болатын. Сонымен қатар  «Спорт – үлкен еңбек, сондықтан уақытты дұрыс басқарып, бағалау қажет. Егер сіз жаттығуға немқұрайды қарасаңыз, додаға шыққан кезде кері әсерін тигізері сөзсіз. Сондықтан өз жолыңызда қандай кедергілерге кезіксеңіз де, нақты мақсаттар қойып, жетуге тырысу міндет», – деген ойларымен бөліскен еді.

Спортшы өзінің келешектегі жоспарлары туралыда айтып, Парижде өтетін олимпиада ойындарына сол уақытта дайындықты бастап кеткенін жеткізген.

Елдос екінші жоғары білімді де қара шаңырақта алған. 2018 жылы заң факультетінде құқықтану мамандығы бойынша диплом қорғаған.

Ғұсман Қырғызбаев заң факультетінің мақтанышы, інісі Ғұмар екеуі бірге оқыған. 2016 жылы Қытайда қазақ күресінен өткен ІІІ әлем чемпионатында Ғұсман мен Ғұмар Қырғызбаевтар 60 және 70 келіге дейінгі салмақ дәрежесінде 2 алтын медаль жеңіп алған.

Ғұсман 2021 жылы дзюдодан әлем чемпионатының күміс жүлдесін иемденген.