Түркістан облысында 120 мыңға жуық жұмыс орны ашылады
Биыл Түркістан облысында "Өңірді жұмыспен қамту картасы" аясында биыл 118,9 мың жұмыс орнын ашу жоспарланған, деп хабарлады Түркістан Өңірлік коммуникациялар қызметінің ресми сайты.
Ведомствоның ресми сайтында хабарланғандай, Түркістан облысы әкімінің тапсырмасымен "Өңірді жұмыспен қамту картасы" аясында биыл 118,9 мың жұмыс орнын ашу жоспарланған. 2024 жылдың қаңтар-шілде айларында 68,5 мың адам жұмыспен қамтылып, қазіргі таңда жоспар 58 пайызға орындалды. Бұл туралы брифингте облыстық жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаева мәлімдеді.
«Жыл басынан 31 мың адам тұрақты жұмыс орнымен, 37,5 мың адам субсидияланған уақытша жұмыс орнымен, 1 500 адам Ұлттық жобалар мен Тұжырымдамалар бойынша ашылған жұмыс орындарымен қамтылды. Бұдан бөлек, жаңа бизнес жобаларды іске асыру мақсатында ағымдағы жылдың 1-2 легінде 5 388 адамнан өтінім түсіп, комиссия шешіміне сәйкес 1 783 адамға грант берілді. Сондай-ақ 2024 жылғы 1 тамыздағы жағдаймен 14 160 отбасыға, яғни 84 860 адамға атаулы әлеуметтік көмек тағайындалды. 2023 жылдың тиісті кезеңімен салыстырғанда аз қамтылған азаматтардың саны 41,9 пайызға төмендеді.
Облыста мүгедектігі бар азаматтарға әлеуметтік қолдау көрсету үшін барлық деңгейдегі бюджеттер есебінен 13,4 млрд теңге бөлінді. Түркістан облысының жұмыспен қамтуды үйлестіру және әлеуметтік бағдарламалар басқармасына қарасты арнаулы әлеуметтік қызметтер көрсетуге арналған 12 орталық бар. Оның ішінде, 4 стационарлық үлгідегі және 6 жартылай стационарлық үлгідегі мекемелер, «Ардагерлер үйі» мен арнаулы кәсіптік колледжі бар» , - деді басқарма басшысы.
