Ұстаз білікті болмаса, үздік оқу бағдарламасы, заманауи мектептердің бәрі бекер – Қасым-Жомарт Тоқаев
Мектепке дейінгі тәрбие беру және оқыту ісіне мемлекетпен қатар ата-аналар да жауапты.
Мемлекет басшысы 2 қыркүйектегі Жолдауында мектептердің жұмысын жақсарту шараларын қолға алған жөн екенін айтты. Соның ішінде білікті ұстаздардың маңызына тоқталды.
Үздік оқу бағдарламасы, заманауи мектептер, озық басқару жүйесі болса да, ұстаз білікті болмаса, оның бәрі бекер екені анық. Сондықтан педагогикалық жоғары оқу орындарына талапты, қабілетті жастарды қабылдауға баса мән беру керек. Жалпы бұл бағыттағы жұмыстың беталысы жақсы, оны жалғастыру қажет, - деді Президент.
Ол баланы мектепке дайындау мәселесіне айрықша назар аударған жөн екеніне де тоқталды.
Мектепке дейінгі тәрбие беру және оқыту ісіне мемлекетпен қатар ата-аналар да жауапты. Сондықтан мектепке дейінгі білім беру саласында әр балаға бөлінетін қаражат отбасының нақты табысына байланысты болуы керек. Осылайша, біз білім беру жүйесін одан әрі жетілдіру арқылы шын мәнінде мұқтаж азаматтарға көмек көрсетеміз және мемлекеттік қолдаудың ашық болуын қамтамасыз етеміз. Түптеп келгенде, азаматтарымыздың әлеуетін арттырамыз, - деді Қасым-Жомарт Тоқаев.
