Мақпал Жүнісова «Алтайдың ар жағынан келген ару» әнінің шығу тарихын айтты
Әнші аталған әнді алғаш орындаған кезінде түсірілген видеоны жариялады.
Әлеуметтік желідегі парақшасында Мақпал Жүнісова «Алтайдың ар жағынан келген ару» әнін алғаш орындаған кездері жайлы жазды, деп хабарлады turkystan.kz.
«1989 жылы осы әннің авторы - марқұм Тұрсынғазы Рахым арнайы мені телеарнаға шақырды. Сол уақытта ағамыз телеарнада қызметте болатын. «Мақпалжан, осы әннің тұсауын өзін кесіп бер» деді. Ал мен «Ойбу, аға! Бұл жігіттер айтатын ән ғой. «Алтайдың ар жағынан келген жігіт» деп жазғаныңызда айтар едім» деп күлдім. Бірақ келісімімді беріп: «Аға, бір аптадан соң «Қазақконцертте» бір концерт болады. Сонда орындап, тұсауын кесіп берейін» дедім. Ол кісі қатты қуанды. 1990 жылы радиоға жазуымды өтінді,артынша Германияда менің алғаш лазерный диском шықты. Соған осы ән енді. Кейіннен Жетісайда гастрольде жүргенде бір қараторы Сәкен Қалымов деген жігіт маған келіп, осы әнді орындағысы келетінін айтты. Мен бірден «Иә, бұл әнді жігіт орындаса тіптен жақсы болады» деп рұқсат еттім. Содан Сәкен Қалымов «Тамашаның» сахнасында эстрадаға лайықты өңдеп, айтып шыққан соң әннің бағы жанған еді. Тынышбай ағамыз да өмірден разы болып өтті», - деп жазды Мақпал Жүнісова.
