"Азық-түлік тапшылығы": Зимбабве билігі 200 пілді азық үшін атпақ
Намибиядағы тәжірибеге сүйеніп, піл етін кептіріп, орап, азық-түлік тапшылығы байқалған аймақтарға жеткізу көзделіп отыр.
Зимбабве билігі 1988 жылдан бері бірінші рет 200 пілді атуға рұқсат берді. Бұл азық-түлік тапшылығы мен құрғақшылыққа байланысты қабылданған шешім, деп жазды euronews.com.
Оңтүстік Африка елінде «пілдер саны тым көп» деп мәлімдеді Зимбабвенің қоршаған орта министрі өткен аптада парламенттік тыңдауларда.
Жергілікті БАҚ-тың хабарлауынша, аңшыларға 200 пілді өлтіру тапсырылған. Зимбабвенің Ұлттық парктер және жабайы табиғат басқармасының басшысы Фултон Мангванья піл аулау жұмысын адамдармен қақтығыстар болған аймақтарда, соның ішінде Зимбабвенің ең ірі қорықтарының бірі Хвангеде өткізу жоспарланғанын айтты. Намибиядағы тәжірибеге сүйеніп, піл етін кептіріп, орап, азық-түлік тапшылығы байқалған аймақтарға жеткізу көзделуде.
Бүкіләлемдік азық-түлік бағдарламасының мәліметінше, Зимбабве соңғы 40 жылдағы ең күшті құрғақшылықты бастан кешіріп жатыр. Бұл көптеген аймақтарда егіннің солып, өнімнің нашарлауына байланысты азық-түлік тапшылығын туғызды. Кейбір сарапшылар мен жануарларды қорғау белсенділері пілдерді ату елдің имиджіне теріс әсер етуі мүмкін, туристерді қашыруы мүмкін деп алаңдап отыр.
Зимбабве аумағында шамамен 100 мың піл бар, бұл Ботсванадан кейінгі әлемдегі екінші үлкен популяция. Бүкіләлемдік жабайы табиғат қорының бағалауынша, Африка мен Азияда жалпы 415 000 піл қалған, ал 20 ғасырдың басында 3-5 миллион болған. Африка мен Азия пілдері жоғалып кету қаупінде тұр деп есептеледі, тек Оңтүстік Африка, Ботсвана, Намибия мен Зимбабве популяциялары «құқықтық қауіпке ұшыраған» ретінде бағаланады.
