260
«Алматы-Қостанай» бағытындағы пойызға жаңа 10 вагон қосылды
Оның ішінде мүмкіндігі шектеулі жандарға арналған арнайы штабтық вагон бар
«Алматы-Қостанай» бағытында жаңа вагондар қатынайды, деп хабарлайды ҚР Көлік министрлігінің баспасөз қызметі.
«Түрксіб Астана» ЖШС жеке тасымалдаушысының паркі 2024 жылы шығарылған купе және плацкарт үлгісіндегі 10 жаңа жолаушылар вагонымен толықты.
Сонымен қатар оның ішінде мүмкіндігі шектеулі жандарға арналған арнайы штабтық вагон бар, – делінген хабарламада.
Барлық вагондар «Зиксто» АҚ отандық өндірушісінен сатып алынды. Вагондар ауа баптағыш жүйелерімен және биоәжетханалармен жабдықталған.
Жоғарыда аталған жаңа жолаушылар вагондары биылғы қараша айынан бастап №43/44 «Қостанай-Алматы» бағыты бойынша қатынайды. Айта кету керек, бұл бағытта қатынайтын вагандор әбден ескірген және жолаушылар тарапынан үнемі шағымдар болатын.
Еске сала кетейік, биыл 122 бірлік жаңа вагон әкелінді, жыл соңына дейін тағы 18 бірлік жеткізіледі деп күтілуде.
