«Қазақстан барысының» жеңімпазы анықталды
Жарысқа 42 балуан қатысты.
Астана қаласында өтіп жатқан «Қазақстан барысының» чемпионы белгілі болды, деп хабарлады turkystan.kz.
Аталған жарыстың бас жүлдесін Абай облысының атынан қатысқан Ерасыл Қажыбаев иеленді. Ал күміс жүлде Ерсұлтан Мұзаппаровқа бұйырды.
Айта кетейік, «Қазақстан барысына» облыстық жарыстардың қорытындысы бойынша іріктелген еліміздің үздік балуандары жиналды. Олар Қазақстанның 17 облысынан және Республикалық маңызы бар Астана, Алматы және Шымкенттен келген.
Сондай – ақ, турнирге былтырғы «Қазақстан Барысы» чемпионы және «Әскер Барысы» командасының екі балуаны қатысты, барлығы 42 қатысушыны құрады.
Ұйымдастырушылардың айтуынша, турнир чемпионы 15 миллион теңге көлемінде бас жүлдеге ие болады.
«Жалпы жүлде қоры 27 100 000 теңгені құрайды, оның 3 720 000 теңгесі жаттықтырушылар үшін бөлінген. Жүлделі орындар келесідей бөлінеді: 1-орын — 15 000 000 теңге, 2-орын — 3 300 000 теңге, 3-орын — 1 080 000 теңге. Сонымен қатар, әрбір жеңіске жеткен жекпе – жек үшін балуан 100 000 теңге алады», - делінген әлеуметтік желідегі парақшада.
