ОҚО-да 16 су қоймасының құрылысы басталмақ

Оңтүстік Қазақстан облысында 16 жаңа су қоймасының құрылыс жүргізілетін болады. Бұл туралы ОҚО әкімінің баспасөз қызметі хабарлайды. Сондай-ақ тасқын суға қарсы 70 нысанда инженерлік жұмыстар іске асырылады.  Аталған жоба жүзеге асқанда  320 миллион текше метр топан су  қабылдап, 17 мың гектар суармалы жерді суғаруға мүмкіндік туады.  Бұл туралы бүгін ҚР Үкіметінің селекторлық отырысында Оңтүстік Қазақстан облысының әкімі Жансейіт Түймебаев мәлім етті. «Биылғы дайындық жұмыстарының жоғары деңгейде атқарылуына байланысты өңір топан судан зардап шеккен жоқ. Алайда  мәселені зерттеп-зерделегенімізде жыл сайын 2 млрд текше метр судың ағып кететіндігіне  көз жеткіздік. Ауыл шаруашылығына бейімделген және жаз айларында су тапшылығына ұрынатын аймақта көктемгі тасқын суды тиімді мақсатқа пайдалану ең басты мәселе болып табылады. Сондықтан да облыстың аумағында әзірге 16 шағын су қоймаларын салып, суармалы егістік алқаптарын көбейтуді жоспарлап отырмыз. Аталған нысандар аймақты тасқын судан қорғап, егіншілікті дамытуға тікелей септігін тигізетін болады. Енді бюджеттен қосымша 250 млн теңге қаржы қарап, тағы да тоғандар мен су қоймаларын салу үшін тиісті жобалау, жоспарлау жұмыстарын жүргіземіз»,- деді Жансейіт Қансейітұлы. Жалпы, облыс аумағында 43 су қоймасы орналасқан. Оның ішінде 20-сы республикалық, 13-і облыстық,  4-еуі аудандық коммуналдық меншігінде.  Ал,  6-уы жеке меншікке берілген.  Қазіргі таңда республикалық бюджет есебінен Тоғыс, Сасықбұлақ, Ақылбексай су қоймаларында 984,9 миллион теңгеге күрделі жөндеу жұмыстары жүргізілуде. 2017-2019 жылдары 11,1 миллиард теңгеге 4 су қоймасында  (Шардара, Таушаға, Досан-Қарабас, Бөген су қоймалары) күрделі жөндеуден өткізілетін болады. Ағымдағы жылы облыстық ауыл шаруашылық басқармасы коммуналдық меншіктегі 4 су қоймасында (Ақсумбе, Бақырлы, Ащы, Текесу) облыстық бюджет есебінен 384,1 миллион теңгеге күрделі жөндеу  жүргізіледі. Бұдан бөлек, Түркістан қаласында 1,7 миллион текше метрге арналған «Қарашық» су қоймасының құрылысы жүргізіліп, жылдың аяғына дейін аяқтау жоспарланып отыр.

Серіктес жаңалықтары