281
Елбасы туралы кітап – әзірбайжан тілінде
Елбасы туралы кітап – әзірбайжан тілінде
Астанадағы Елбасы кітапxанасында «Нұрсұлтан Назарбаев. Биография» кітабының әзірбайжан тіліндегі басылымының тұсаукесер рәсімі өтті.
Кітапты әзірбайжан тіліне Халықаралық Түркі академиясының ұсынысымен белгілі журналист, И.Гаспыралы атындағы сыйлықтың лауреаты Аида Эйвазова аударды. «Түркі әлемі үшін әйгілі тұлға туралы кітапты аудару бақытына ие болып отырғаныма өте қуаныштымын. Нұрсұлтан Әбішұлы – әлем адамы. Кітапты аударып отырып ұлы тұлғадан сабақ алғандай әсерде болдым», – дейді Аида Эйвазова. Кітаптың тұсауын кітап авторы, ҚР Президенті Кеңсесінің бастығы, Тұңғыш Президент – Елбасы кітапханасы директорының міндетін атқарушы, профессор Махмұд Қасымбеков пен Әзірбайжан Республикасы Президентінің қоғамдық-саяси мәселелер жөніндегі көмекшісі Әли Гасанов кесті. «Кейбір ұлы тұлғалардың өмірі бүкіл халықтың тарихи өмірін тың арнаға бұрып жатады. Әзірбайжан халқының басшылығына қиын-қыстау кезеңде жалпыұлттық көшбасшы Гейдар Алиев келсе, қазақтың бағына Нұрсұлтан Назарбаев басшы болды. Ол тоқсаныншы жылдары қазақтарды титулды ұлт ретінде көтерді. «Нұрлы көш» бағдарламасы арқылы шеттегі қазақтарды тарихи отанына шақырды. Қазақстанда әзірбайжан азаматтары өзгемен тең өмір сүріп, саяси және қоғамдық жұмыстарға белсене атсалысып келеді. Қазақстан халқы Ассамблеясы институтын құрған Нұрсұлтан Әбішұлының еңбегі ерекше», – деді Әли Гасанов.
2012 жылы жарық көрген туынды орыс, ағылшын, венгр, араб, неміс, серб және француз тілдеріне аударылды. Кітап Нұрсұлтан Назарбаевтың өмірі мен қызметін ресми тарихи-өмірбаяндық тұрғыдан зерттеудегі алғашқы тәжірибені ұсынады. Онда қарапайым ауыл баласынан ұлт көшбасшысына дейінгі жолы егжей-тегжейлі баяндалған. ХХ-ХХІ ғасырлар тоғысындағы Қазақстанның дамуын драмалық және елеулі оқиғалар, үдерістер, тарихи өткенге шолумен баяндайтын Елбасының саяси өміріне ерекше ден қойылған. Кеңейтілген ауқымды мұрағаттық материалдар негізінде дайындалған Елбасы өмірбаяны Қазақстанның жаңа тарихы бойынша маңызды құжаттық дереккөз болып табылады.
