2062
Қос тойың қабат болсын
Қос тойың қабат болсын
Елбасы Нұрсұлтан Назарбаев: «Қазақстан агломерацияны дамыту стратегиясын жүзеге асыруды бастады. Егер бізде бұған дейін миллион тұрғыны бар тек Алматы қаласы болса, қазір үш мегаполисіміз бар – Алматы, Астана және Шымкент қалалары…», – деп ерекше атап өткен жайт өмірден орын алды.
Оңтүстік Қазақстан облыстық мәслихатының кезектен тыс жиырма үшінші сессиясында депутаттардың қарауына Шымкент қаласы халқының бір миллионға жетуіне орай, оған ерекше мәртебе беру, облыс орталығын Түркістан қаласына көшіру және осыған байланысты облыстың, Түркістан, Кентау қалаларының шекараларына өзгерістер енгізу мәселелері ұсынылды.
Енгізіліп отырған өзгерістерге сәйкес, Түркістан қаласының облыс орталығы болуы кезінде қала әкімдігіне қарасты 12 ауыл округі Кентау қаласы әкімдігінің қарамағына өтетін болады. Шымкент қаласының аумағы өзгеріссіз қалып, облыстың аумағынан жеке бөлініп шығуына байланысты облыстың аумағы қысқармақ. Сонымен қатар, әлеуметтік, әкімшілік нысандардың орналасу жағдайы мен инфрақұрылыммен, оның ішінде, ауыз сумен, газбен, автомобиль жолдарымен, байланыс желілерімен қамтылуы, ағын сумен қамтамасыз етілуі, жер жағдайы, олардың халыққа ыңғайлы болу мәселелерінің барлығы ескерілген.
Сессия жұмысына қатысқан облыс әкімі Жансейіт Түймебаев баршаны Шымкент қаласы тұрғындарының 1 миллионға жетуімен құттықтады. «Елбасымыз Нұрсұлтан Әбішұлы Назарбаев қашан да ұлт руханиятының алтын ұясы, қазақ тарихының түп тамыры – Оңтүстікке айрықша көңіл бөліп келеді. Тәуелсіз қазақ елінде тұңғыш рет миллиондық қаланы межелеу, оған арнайы мәртебе беру ісі 2014 жылдан басталды. Бүгінде көзделген мақсат орындалып, Шымкент қаласы тұрғындары 1 миллионға жетіп отыр. Біз Шымкентке республикалық мәртебе берумен қатар, жаңадан облыс орталығын таңдау бақыты бұйырған тарихи сәттің табалдырығында тұрмыз. Мұндай орталық ретінде Қазақ елі үшін ғана емес, исі түркі әлеміне ортақ, қасиетті Түркістанның таңдалуын халықтың зор ықыласпен қабылдауын қуанышпен атап айтқым келеді. Мұны Түркістан, Кентау қалаларының шекараларына өзгерістер енгізу барысында тұрғындармен жүргізілген қоғамдық тыңдаулар мен өздеріңізбен талқылау барысында айқын сезініп отырмыз», – деді аймақ басшысы.
Аталған мәселе бойынша Үкімет жанынан құрылған арнайы жұмысшы топпен бірлесе бөлудің экономикалық тиімділігіне, оның облыстың, Шымкент, Түркістан, Кентау қалаларының әлеуметтік-экономикалық дамуына әсері жан-жақты талданды.
Жоғарыда аталған ұсынысты қолдаған халық қалаулылары Оңтүстік Қазақстан облысының әкімшілік-аумақтық құрылысының кейбір мәселелері туралы облыс әкімдігі қаулысы мен мәслихаттың шешіміне қол қойды.
Жалпы, қаланың инженерлік-инфрақұрылыммен қамтылу деңгейі жоғары болып табылады. Бұл көрсеткіш Шымкент қаласына ерекше мәртебе беруіне толық мүмкіндік береді. Қазақта «қос тойың қабат болсын, екі дүниең абат болсын» дейтін керемет сөз бар екенін айтқан облыс әкімі Жансейіт Түймебаев Ұлы Тұран даласының темірқазығы, Ұлы түркі бабалардың түпқазығы саналатын қасиетті өлке Түркістанды облыс орталығы ету ұсынысы баршаға ерекше ой салатынын жеткізді.
«Түркістан – рухты қайрап, Алашты арқаландырып, тағдырлы кезеңдерде қазақ дейтін елді сақтап, берекесін арттыра білген қасиетті жер. Санаға сілкініс туғызып, отаншылдық сезімді тереңдететін тың бастама рухани жаңғырудың жарқын көрінісі болары анық. Осы орайда Түркістан туризм саласы бойынша Самарқан, Бұхара, Хиуа сияқты қалалармен бәсекелесіп, Түркі әлемінің астанасы және облыс орталығы ретінде әлемдік аренада Қазақстанның беделін биіктетіп мәртебесін асқақтатады деп есептеймін», – деді қорытынды сөзінде облыс әкімі.
Елбасының Шымкентті миллион тұрғыны бар орталыққа айналдыру бастамасы жүзеге асып, қазақтың миллион халқы бар үш қаласының біріне айналды. Ұлы Жібек жолының бойындағы бұл шаһардың тарихы мен тамыры тым тереңде жатыр. Орталық Азиядағы сан ғасырлық ғұмыры бар санаулы қалалардың бірі болған Шымкент енді бірегейіне айналмақ. Қалаға үшінші мегаполис статусы берілсе, қала бюджетінің кірісі 72,1 млрд теңгеге, субвенция 13,4 млрд теңгеге жетпекші.
